Soxta gvardiyachi yoshlardan 200 ming so‘m talab qilganda qo‘lga olindi.
Joriy yilning 3 may kuni kechqurun Milliy gvardiya Andijon viloyati bo‘yicha boshqarmasi harbiy xizmatchilari "Xotira maydoni" bog‘ida xizmat olib borayotgan vaqtda bir guruh yoshlar bir biri bilan o‘zaro kelisholmayotganini ko‘rib qolishdi. Masalaga oydinlik kiritish uchun besh nafar yigit va bir qiz hududdagi Ichki ishlar bo‘limiga olib borildi.
Dastlabki surishtiruv ishlari natijasida 2001 yilda tug‘ilgan S.M., 2002 va 2004 yilda tug‘ilgan aka-uka K.K., 2003 yilda tug‘ilgan E.I. bir qiz bilan gaplashib o‘tirgan vaqtida 25 yoshli F.M. ularga yaqinlashib, yoshlarning suhbatini mobil telefon kamerasiga videoga olishni boshlagan.
F.M. yoshlarga o‘zini Milliy gvardiya xodimi deb tanishtirib, "ishni to‘xtatish va videoni o‘chirish" uchun 200 000 so‘m talab qilgan.
Hozirda mazkur holat yuzasidan Ichki ishlar organlari tomonidan tergovga qadar tekshiruv ishlari olib borilmoqda.
Hurmatli fuqarolar! Sizdan hushyorroq bo‘lishingizni, o‘zini Milliy gvardiya yoki boshqa huquqni muhofaza qiluvchi organ xodimi sifatida tanishtirib, lekin rasmiy guvohnomasini ko‘rsatmagan shaxslarga ishonmaslikni so‘raymiz. Milliy gvardiya harbiy xizmatchi va xodimlari hamda ularning faoliyati bilan bog‘liq barcha masalalar bo‘yicha ichki xavfsizlik boshqarmasi yoki uning hududiy bo‘linmalariga Milliy gvardiya veb-saytida ko‘rsatilgan telefon raqamlari orqali xabar berishingizni so‘raymiz.
