Сохта гвардиячи ёшлардан 200 минг сўм талаб қилганда қўлга олинди.
Жорий йилнинг 3 май куни кечқурун Миллий гвардия Андижон вилояти бўйича бошқармаси ҳарбий хизматчилари "Хотира майдони" боғида хизмат олиб бораётган вақтда бир гуруҳ ёшлар бир бири билан ўзаро келишолмаётганини кўриб қолишди. Масалага ойдинлик киритиш учун беш нафар йигит ва бир қиз ҳудуддаги Ички ишлар бўлимига олиб борилди.
Дастлабки суриштирув ишлари натижасида 2001 йилда туғилган С.М., 2002 ва 2004 йилда туғилган ака-ука К.К., 2003 йилда туғилган Э.И. бир қиз билан гаплашиб ўтирган вақтида 25 ёшли Ф.М. уларга яқинлашиб, ёшларнинг суҳбатини мобил телефон камерасига видеога олишни бошлаган.
Ф.М. ёшларга ўзини Миллий гвардия ходими деб таништириб, "ишни тўхтатиш ва видеони ўчириш" учун 200 000 сўм талаб қилган.
Ҳозирда мазкур ҳолат юзасидан Ички ишлар органлари томонидан терговга қадар текширув ишлари олиб борилмоқда.
Ҳурматли фуқаролар! Сиздан ҳушёрроқ бўлишингизни, ўзини Миллий гвардия ёки бошқа ҳуқуқни муҳофаза қилувчи орган ходими сифатида таништириб, лекин расмий гувоҳномасини кўрсатмаган шахсларга ишонмасликни сўраймиз. Миллий гвардия ҳарбий хизматчи ва ходимлари ҳамда уларнинг фаолияти билан боғлиқ барча масалалар бўйича ички хавфсизлик бошқармаси ёки унинг ҳудудий бўлинмаларига Миллий гвардия веб-сайтида кўрсатилган телефон рақамлари орқали хабар беришингизни сўраймиз.
