Jinoyat sodir etgani uchun qidiruvda bo‘lgan besh nafar shaxs kuzatuv kameralari orqali aniqlanib qo‘lga olindi
Joriy yilning 14-19 sentyabr kunlari davomida Milliy gvardiya harbiy xizmatchi va xodimlari tomonidan jinoyat sodir etgani uchun ichki ishlar organlari tomonidan qidiruvda bo‘lgan besh nafar shaxs qo‘lga olindi.
Jumladan, 14-sentyabr kuni Yakkasaroy tumanidagi mehmonxonalardan birida Qo‘riqlash bo‘limi xodimlari Toshkent shahar IIB xodimlari bilan hamkorlikda 43 yoshli M.A. ni qo‘lga olishdi. Ushbu fuqaro O‘zbekiston Respublikasi Jinoyat kodeksining 167-moddasi (“O‘zlashtirish yoki rastrata yo‘li bilan talon-toroj qilish”) da nazarda tutilgan jinoyatni sodir etganlik uchun qidiruvda bo‘lgan.
Shu kuni poytaxtning Yashnobod tumanidagi masjidda firibgarlikda gumon qilinib qidiruvda bo‘lgan 49 yoshli K.M.,
Buxoro dehqon bozorida o‘g‘irlikda gumon qilinib qidiruvda bo‘lgan 43 yoshli fuqaro X.O., lar ham qo‘lga olindi.
Joriy yilning 16-sentyabr kuni Poytaxtning Olmazor tumanida “Korzinka” supermarketi yonida “Qo‘riqlash” xizmati xodimlari tomonidan firibgarlik sodir etgani uchun qidiruvda bo‘lgan 38 yoshli T.S. qo‘lga olindi.
19-sentyabr kuni Toshkent shahrining Yunusobod tumanida, “Korzinka” supermarketi yonida tezkor harakatlanuvchi guruh xodimlari tomonidan joriy yilning avgust oyidan buyon huquq-tartibot idoralaridan yashirinib kelayotgan 21 yoshli fuqaro K.G‘. qo‘lga olindi. Ushbu fuqaroga nisbatan bezorilik qilgani uchun jinoiy ish qo‘zg‘atilgan.
Barcha qo‘lga olinganlar o‘rnatilgan tartibda ichki ishlar bo‘limlariga topshirilgan va tegishliligi bo‘yicha masʼul xodimlar tomonidan surishtiruv ishlari olib borilmoqda.
