VATAN HIMOYACHILARI KUNIGA BAG‘ISHLANGAN “ZAKOVAT” TURNIRI BO‘LIB O‘TDI
Poytaxtimizdagi Zakovat arenada O‘zbekiston Respublikasi Qurolli Kuchlari tashkil topganligining 32-yilligi hamda 14 yanvar - Vatan himoyachilari kuniga bag‘ishlangan “Zakovat” turniri bo‘lib o‘tdi. Unda O‘zbekiston Respublikasi Milliy gvardiyasi, Ichki ishlar, Mudofaa, Favqulotda vaziyatlar vazirliklari va Davlat xavfsizlik xizmati Chegara qo‘shinlari, Bojxona qo‘mitalarining harbiy xizmatchi va xodimlari, faxriylar va harbiy taʼlim muassasalarining kursant va o‘quvchilaridan iborat 55 ta jamoa ishtirok etishdi. Vatan himoyachilari kuniga bag‘ishlangan “Zakovat” turniri O‘zbekiston Respublikasi Madhiyasi bilan boshlandi. Shundan so‘ng o‘yinlarga start berildi. 3-raunddan iborat bo‘lgan o‘yin davomida 12 tadan jami 36 ta savol o‘rtaga tashlandi. Aksariyati harbiy sohaga oid maʼlumotlardan tuzilgan savollarga barcha jamoalarning aʼzolari, tez va to‘g‘ri javob berishga harakat qilishdi. Milliy gvardiya bo‘linmalaridan ishtirok etgan 14 ta jamoa vakillari ham musobaqada munosib ishtirok etishib, o‘zlari uchun ulkan tajriba to‘plashdi. Sog‘lom raqobat va do‘stona ruhda o‘tgan “Zakovat” turniri barcha ishtirokchilarga Mudofa, Ichki ishlar vazirliklari va Milliy gvardiya ashula va raqs ansambli xonandalarining vatanparvarlik ruhidagi qo‘shiqlari bilan bayromona kayfiyat ulashdi. Shuningdek, tadbir davomida Jamoat xavfsizligi universiteti kursantlari tomonidan saf chiqish ko‘rinishlari namoyish etildi.
