VATANPARVARLIK – MILLIY YUKSALISH KAFOLATI
Qoraqalpog‘iston Respublikasining Amudaryo tumani Qilichboy Madaniyat markazida Milliy gvardiya Qoraqalpog‘iston Respublikasi boshqarmasi, Yoshlar ishlar agentligi va Yoshlar ittifoqi tuman kengashi bilan hamkorlikda “Mard va sadoqatli vatanparvarlarni tarbiyalash maktabdan boshlanadi” shiori ostida mahalla yoshlari bilan uchrashuv o‘tkazildi.
Mamlakatimizda yoshlarni vatanparvarlik ruhida tarbiyalash, harbiy kasbga nisbatan g‘urur va iftixor hissini uyg‘otish, xalq va armiya yakdilligini taʼminlash maqsadida amalga oshirilayotgan bu kabi tadbirlar yoshlarda harbiy sohaga bo‘lgan qiziqishlarini oshirib bormoqda.
Mahallaning barcha faol yoshlarini qamrab olgan vatanparvarlik tadbiri ham yuqori kayfiyatda jo‘shqin taassurotlarga boy bo‘ldi.
Ushbu o‘tkazilgan tadbirda Milliy gvardiya harbiy qismning bir guruh harbiylari faxriy qorovul va qo‘l jangi elementlari ko‘rgazmasi bilan ishtirok etgan bo‘lsa, Madaniyat markazi jamoasi tomonidan ijro etilgan jahon va o‘zbek klassik musiqalari va qo‘shiqlar yoshlarni raqsga chorladi.
Uchrashuv mobaynida harbiylar o‘quvchilarga qurol-yarog‘lardan foydalanish va merganlik sir-asrorlari bilan o‘rtoqlashdi.
Yoshlar o‘rtasida “Arqon tortish” va "Tosh ko‘tarish " sport musobaqalari tashkillashtirilib, g‘oliblarga tashkilotchilar tomonidan esdalik sovg‘alari topshirildi.
