ВАТАНПАРВАРЛИК – МИЛЛИЙ ЮКСАЛИШ КАФОЛАТИ
Қорақалпоғистон Республикасининг Амударё тумани Қиличбой Маданият марказида Миллий гвардия Қорақалпоғистон Республикаси бошқармаси, Ёшлар ишлар агентлиги ва Ёшлар иттифоқи туман кенгаши билан ҳамкорликда “Мард ва садоқатли ватанпарварларни тарбиялаш мактабдан бошланади” шиори остида маҳалла ёшлари билан учрашув ўтказилди.
Мамлакатимизда ёшларни ватанпарварлик руҳида тарбиялаш, ҳарбий касбга нисбатан ғурур ва ифтихор ҳиссини уйғотиш, халқ ва армия якдиллигини таъминлаш мақсадида амалга оширилаётган бу каби тадбирлар ёшларда ҳарбий соҳага бўлган қизиқишларини ошириб бормоқда.
Маҳалланинг барча фаол ёшларини қамраб олган ватанпарварлик тадбири ҳам юқори кайфиятда жўшқин таассуротларга бой бўлди.
Ушбу ўтказилган тадбирда Миллий гвардия ҳарбий қисмнинг бир гуруҳ ҳарбийлари фахрий қоровул ва қўл жанги элементлари кўргазмаси билан иштирок этган бўлса, Маданият маркази жамоаси томонидан ижро этилган жаҳон ва ўзбек классик мусиқалари ва қўшиқлар ёшларни рақсга чорлади.
Учрашув мобайнида ҳарбийлар ўқувчиларга қурол-яроғлардан фойдаланиш ва мерганлик сир-асрорлари билан ўртоқлашди.
Ёшлар ўртасида “Арқон тортиш” ва "Тош кўтариш " спорт мусобақалари ташкиллаштирилиб, ғолибларга ташкилотчилар томонидан эсдалик совғалари топширилди.
