VATANPARVARLIK HISSI YoSHLIKDAN BOSHLANADI
O‘zbekiston Respublikasi Milliy gvardiyasiga biriktirilgan Yunusobod tuman 58-sonli o‘rta taʼlim maktabi o‘quvchi yoshlari uchun harbiy xizmatchilar tomonidan muntazam ravishda turli ekskursiyalar, madaniy-maʼrifiy tadbirlar va sport musobaqalari muntazam ravishda o‘tkazib kelinmoqda.
Jumladan, joriy yilning 7 aprel kuni Sohibqiron Amir Temur tavalludining 685 yilligi munosabati bilan poytaxtimizda joylashgan "Temuriylar davlat muzeyi", Amir Temur xiyoboni va Milliy gvardiya Temurbeklar maktabi ixtisoslashtirilgan akademik litseyiga sayohat uyushtirildi.
Tashrif davomida o‘quvchi yoshlarga davlat arbobi va buyuk sarkardaning hayoti va jasorati, shuningdek, uning harbiy sanʼat, davlat tuzilishi hamda uni boshqarishga oid bo‘lgan qarashlari, fikr-mulohazalari aks etgan "Temur tuzuklari" kitobi haqida so‘zlab batafsil maʼlumot berib o‘tildi. Shuningdek, o‘quvchilar Temurbeklar maktabida yaratilgan sharoitlar, dars jarayonlari bilan bevosita tanishdi.
Tadbir so‘ngida, mazkur taʼlim dargohida o‘qishni davom ettirish istagida bo‘lgan o‘quvchilar qabul jarayoni va tartibi bo‘yicha o‘zlarini qiziqtirgan barcha savollariga javob oldi.
