Vatanparvarlik oyligi doirasida tizimli ishlar
Hozirgi kunda butun respublikamiz bo‘ylab O‘zbekiston Respublikasi Qurolli Kuchlari tashkil etilganligining 30 yilligi va 14 yanvar - “Vatan himoyachilari kuni”ga bag‘ishlangan tadbirlar bo‘lib o‘tmoqda. O‘zbekiston Respublikasi milliy gvardiyasi Navoiy viloyati bo‘yicha boshqarmasi tashabbusi bilan “Ochiq eshiklar” kuni tashkil etildi. Mazkur sana munosabati bilan tashkil etilgan tadbirda mustaqillik yillari O‘zbekistonda harbiy-siyosiy sohada amalga oshirilgan keng ko‘lamli islohotlar natijasida yurtimiz xavfsizligi va tinchligi, sarhadlarimiz daxlsizligini ishonchli himoya qilishga har jihatdan qodir, zamonaviy, eng yangi qurol-yarog‘lar va harbiy texnika bilan taʼminlangan, mutlaqo yangi Milliy armiya vujudga kelgani haqida so‘z yuritildi. Tadbirda Mudofaa ishlari bo‘limi, IIB, FVB, hamda Milliy gvardiyaga biriktirilgan Karmana tumanidagi 10-sonli maktab, Xatirchi tumanidagi 88-AFCHO‘IM, Navoiy shahridagi 1-sonli maktab o‘quvchilari ishtirok etishdi. Tadbir davomida yoshlarga qurol-aslahalar, harbiy texnikalar ko‘rgazmasi namoyish etilib, atroflicha tushunchalar berildi. Tadbir doirasida sportning “Kamondan otish” turiga qiziquvchi yoshlar uchun ham mahorat darslari tashkil etilib, bunda yoshlar kamonning kelib chiqish tarixi va uning sir-sinoatlari haqida bilim va ko‘nikmalarga ega bo‘ldilar. Qizg‘in kechgan tadbirda Madaniyat xodimlari tomonidan kuylangan kuy va qo‘shiqlar tadbirga o‘zgacha kayfiyat baxsh etdi.
