YANGI O‘ZBEKISTON – YОSHLAR NIGOHIDA
Davlatimiz rahbari tomonidan ilgari surilgan beshta ustuvor yo‘nalish bo‘yicha Harakatlar strategiyasining tegishli bandiga asosan yoshlar, taʼlim muassasalari o‘quvchilari va jamoatchilik o‘rtasida huquqbuzarliklarni, terrorizm, ekstremizm va boshqa jinoiy faoliyatni oldini olishga va yoshlarni huquqiy ongi hamda huquqiy madaniyatini oshirishga qaratilgan kompleks profilaktik-tushuntirish tadbirlarini o‘tkazish belgilangan, shu munosabat bilan Nurafshon shahrida shahar hokimligi, Chirchiq harbiy prokuraturasi, Milliy gvardiya Toshkent viloyati bo‘yicha boshqarmasi hamda shahar yoshlar ittifoqi hamkorligida “Yangi O‘zbekiston – yoshlar nigohida” shiori ostida davra suhbati hamda besh muhim tashabbus doirasida maʼrifiy tadbirlar tashkil etildi.
Tadbir Chirchiq shahar harbiy prokuraturasi, Nurafshon shahar xokimligi va Milliy gvardiya Toshkent viloyati bo‘yicha boshqarmasi masʼul vakillari boshchiligida tashkil etilib, unda muddatli harbiy xizmatchilar hamda Nurafshon shahridagi umumiy o‘rta taʼlim maktablarining harbiy-vatanparvarlik yo‘nalishiga ixtisoslashtirilgan sinf o‘quvchilari ishtirok etdi.
Ko‘tarinki ruhda kechgan davra suhbatida yosh askarlar va o‘quvchilar o‘zlarini qiziqtirgan harbiy sohaga oid barcha maʼlumotlarga ega bo‘lishdi.
Tadbirning ikkinchi qismida ishtirokchilarga beshta muhim tashabbus doirasida rasm chizish, haykaltaroshlik, o‘ymakorlik bo‘yicha mahorat darslari va ko‘rgazmalar hamda xalq cholg‘u asboblarida kuy chalish bo‘yicha chiqishlar namoyish etilib, faol ishtirok etgan yoshlarga tashkilotchilar tomonidan sovg‘a tariqasida kitoblar taqdim etildi.
O‘tkazilayotgan bu kabi tadbirlardan ko‘zlangan maqsad bugungi murakkab globallashuv davrida jamiyatimizda milliy g‘oya va mafkuraviy immunitetni kuchaytirish, yoshlarni huquqiy ongi va madaniyatini oshirish, turli zararli g‘oya va tahdidlardan asrash, ularni o‘z mustaqil fikriga ega irodali, fidoyi va vatanparvar etib tarbiyalash, buzg‘unchi va zararli g‘oyalar, jinoyatchilik, giyohvandlik, loqaydlik va maʼnaviy qashshoqlik kayfiyatidan asrashga qaratilgan.
