YANGI TIZIM IJROSI AMALDA
Barchamizga maʼlum Yurtboshimiz raisligida 28 iyul kuni o‘tkazilgan videoselektor yig‘ilishida mehribonlik uylaridagi bolalarni oilaga yaqin muhitda tarbiyalash, bilim va maʼnaviyatli, vatanparvar insonlar etib voyaga yetkazishga alohida eʼtibor qaratilib, bu borada yangi tizim joriy qilinishi va bunga Milliy gvardiya masʼul etib belgilanishi taʼkidlangan edi.
Ushbu maʼsuliyatli vazifani sifatli amalga oshirish borasida oldin xabar qilganimizdek Milliy gvardiya qo‘mondoni poytaxtimizda Oilaviy bolalar uyi tashkil qilish istagida bo‘lgan fuqarolarni qabul qilib, ularga qisqa muddatlarda barcha zarur shart-sharoitlar yaratib berilishi yuzasidan tegishliligi bo‘yicha masʼul vazirlik va tashkilotlar xodimlariga topshiriqlar bergan edi.
Amalga oshirilgan ishlar natijasida bugun Toshkent shahri Yunusobod tumanida ilk marotaba Umida Turdaliyeva va Murodjon Xasanovlar oilasi 21 sonli Mehribonlik uyidan 5 nafar o‘g‘il-qizlarni o‘z tarbiyasiga olib Oilaviy bolalar uyi faoliyatini yo‘lga qo‘ydilar.
Mazkur Oilaviy bolalar uyi ochilish marosimida Milliy gvardiya qo‘mondonligi, Yunusobod tuman hokimligi va boshqa masʼul vazirlik hamda tashkilotlar mutasaddi rahbarlari ishtirok etib, Umida Turdaliyeva boshlagan ushbu oliyjanob ishga muvaffaqiyat tilagan holda, doimo ko‘makdosh bo‘lishlariga hamda oila aʼzosiga aylangan ushbu o‘g‘il qizlarning maʼnaviyatli va vatanparvar bo‘lib kamol topishlariga ishonch bildirdilar.
