“Yangi nafas”: marafonchilar yugurishni O‘zbekiston mustaqilligining 32 yilligiga bag‘ishlaydi
Bugun O‘zbekiston yengil atletika Federatsiyasida matbuot anjumani bo‘lib o‘tdi, unda OAV vakillariga 4-sentyabr kuni respublika Mustaqilligi bayramiga bag‘ishlab o‘tkaziladigan “Yangi nafas” ommaviy sport musobaqasi haqida maʼlumot berildi.
Marafon tashkiliy qo‘mitasi aʼzosi Shuhrat Usmonov va O‘zbekiston yengil atletika federatsiyasi bosh kotibi Kamoliddin Ro‘zamuhamedovning maʼlum qilishicha mustaqillikning 32 yilligi Toshkent, Nurafshon , Guliston, Andijon, Namangan, Farg‘ona, Jizzax, Samarqand, Navoiy, Buxoro, Qorovulbozor, Termiz, Qarshi, G‘uzor, Xiva va Nukusda “Yangi Nafas” ommaviy yugurish musobaqasi bilan nishonlanadi. Poytaxtda yuguruvchilarga 3 va 10 kilometrga teng bo‘lgan ikki xil masofa, boshqa shaharlarda esa 3 kilometrlik bitta masofa taqdim etiladi.
“Yangi Nafas” yugurish musobaqasining rasmiy shiori – “Bir vatanda, bir vaqtda, bir masofaga, bir maqsadda – birga yuguramiz!” mamlakatimizning 7 yoshdan 70 yoshgacha bo‘lgan har bir fuqarosini birlashtirgan holda, O‘zbekiston Respublikasi davlat mustaqilligini nishonlash jarayonidagi kayfiyat va umumiy muhitni yana-da aniqroq aks ettiradi.
“Yangi Nafas”, shuningdek, yugurish ixlosmandlari uchun xalqaro maydonchaga aylanib bormoqda. Tadbir O‘zbekistonda istiqomat qilayotgan va musobaqalarda faol ishtirok etib kelayotgan xorijlik fuqarolardan tashqari, Markaziy Osiyo mamlakatlaridan keladigan musobaqa qatnashchilarini ham birlashtiradi. Sentyabr oyida Toshkentga Qozog‘iston, Tojikiston, Qirg‘iziston sport klublari vakillari ushbu bayramda ishtirok etish uchun tashrif buyuradilar.
Aholining barcha qatlamlari sport musobaqalarida ishtirok etishlari uchun keng imkoniyat yaratish maqsadida Qoraqalpog‘iston Respublikasi hamda barcha viloyatlarda musobaqa uchun ro‘yxatdan o‘tish va qatnashish bepul! Yengil atletika federatsiyasi tashabbusi bilan har bir hududda “Yagona ijtimoiy himoya reyestri”, “temir” daftar, “ayollar” va “yoshlar” daftarlariga kiritilgan fuqarolarning ishtirok etishi uchun kvotalar ajratilgan. Yugurish musobaqalari va marafonlarning doimiy ishtirokchilari orasida nogironligi bor fuqarolar ham mavjud.
Milliy gvardiya harbiy xizmatchilar va xodimlari ham “Yangi nafas” marafonida faol ishtirok etmoqda. Navbatdagi, to‘rtinchi ommaviy marafon ham bundan mustasno emas, posbonlar yugurish marafonida muvaffaqqiyatli ishtirok etish va g‘alaba qozonish uchun tayyorgarlikni boshlab yuborganlar.
