“Янги нафас”: марафончилар югуришни Ўзбекистон мустақиллигининг 32 йиллигига бағишлайди
Бугун Ўзбекистон енгил атлетика Федерациясида матбуот анжумани бўлиб ўтди, унда ОАВ вакилларига 4-сентябрь куни республика Мустақиллиги байрамига бағишлаб ўтказиладиган “Янги нафас” оммавий спорт мусобақаси ҳақида маълумот берилди.
Марафон ташкилий қўмитаси аъзоси Шуҳрат Усмонов ва Ўзбекистон енгил атлетика федерацияси бош котиби Камолиддин Рўзамуҳамедовнинг маълум қилишича мустақилликнинг 32 йиллиги Тошкент, Нурафшон , Гулистон, Андижон, Наманган, Фарғона, Жиззах, Самарқанд, Навоий, Бухоро, Қоровулбозор, Термиз, Қарши, Ғузор, Хива ва Нукусда “Янги Нафас” оммавий югуриш мусобақаси билан нишонланади. Пойтахтда югурувчиларга 3 ва 10 километрга тенг бўлган икки хил масофа, бошқа шаҳарларда эса 3 километрлик битта масофа тақдим этилади.
“Янги Нафас” югуриш мусобақасининг расмий шиори – “Бир ватанда, бир вақтда, бир масофага, бир мақсадда – бирга югурамиз!” мамлакатимизнинг 7 ёшдан 70 ёшгача бўлган ҳар бир фуқаросини бирлаштирган ҳолда, Ўзбекистон Республикаси давлат мустақиллигини нишонлаш жараёнидаги кайфият ва умумий муҳитни янада аниқроқ акс эттиради.
“Янги Нафас”, шунингдек, югуриш ихлосмандлари учун халқаро майдончага айланиб бормоқда. Тадбир Ўзбекистонда истиқомат қилаётган ва мусобақаларда фаол иштирок этиб келаётган хорижлик фуқаролардан ташқари, Марказий Осиё мамлакатларидан келадиган мусобақа қатнашчиларини ҳам бирлаштиради. Сентябр ойида Тошкентга Қозоғистон, Тожикистон, Қирғизистон спорт клублари вакиллари ушбу байрамда иштирок этиш учун ташриф буюрадилар.
Аҳолининг барча қатламлари спорт мусобақаларида иштирок этишлари учун кенг имконият яратиш мақсадида Қорақалпоғистон Республикаси ҳамда барча вилоятларда мусобақа учун рўйхатдан ўтиш ва қатнашиш бепул! Енгил атлетика федерацияси ташаббуси билан ҳар бир ҳудудда “Ягона ижтимоий ҳимоя реестри”, “темир” дафтар, “аёллар” ва “ёшлар” дафтарларига киритилган фуқароларнинг иштирок этиши учун квоталар ажратилган. Югуриш мусобақалари ва марафонларнинг доимий иштирокчилари орасида ногиронлиги бор фуқаролар ҳам мавжуд.
Миллий гвардия ҳарбий хизматчилар ва ходимлари ҳам “Янги нафас” марафонида фаол иштирок этмоқда. Навбатдаги, тўртинчи оммавий марафон ҳам бундан мустасно эмас, посбонлар югуриш марафонида муваффаққиятли иштирок этиш ва ғалаба қозониш учун тайёргарликни бошлаб юборганлар.
