Yoshlar o‘rtasida sportning “Kamondon otish” va “Mini futbol” turlarini yana-da ommalashtirish bo‘yicha Milliy gvardiya hududlardagi ichki ishlar organlari va Yoshlar siyosati va sport boshqarma bilan hamkorlikda noyabr oyiga qadar bolalar, o‘smirlar va kattalar o‘rtasida Milliy gvardiya kubogi musobaqalarining saralash hamda respublika bosqichlarini o‘tkazishni rejalashtirgan. Hozirda musobaqalar qizg‘in davom etmoqda.

Nurafshon shahrida Milliy gvardiya Toshkent viloyati bo‘yicha boshqarmasi va viloyat Yoshlar siyosati va sport boshqarmasi hamkorligida o‘tkazilgan ushbu “Mini futbol” va “Kamondan otish” sporti turlari bo‘yicha musobaqalarda viloyatdagi barcha tuman va shaharlardan o‘g‘il va qizbolalardan iborat 16 ta jamoa ishtirok etishib, o‘zaro g‘oliblik uchun bellashishdi. Ishtirokchilar birinchilikni qo‘lga kiritish uchun astoydil harakat qilishdi. Har bir bellashuv qizg‘in bahslarga boy o‘tdi. Musobaqalarni tajribali sport hakamlari odilona baholab borishdi.

Musobaqada eng kuchli, faol, mahoratli, mergan, ahil jamoa singari nominatsiyalarda g‘oliblar saralandi. Shuningdek, eng yaxshi murabbiy ham aniqlandi.

Yakunda “Mini futbol” sport turida 3-o‘rinni Bekobod shahar, 2-o‘rinni Parkent tumani, 1-o‘rinni Angren shahar jamoalari qo‘lga kiritishdi. “Kamondan otish” sportida esa qizlar o‘rtasidagi bahslarda barcha sovrinli o‘rinlarga Bekobod shahri jamoasi egalik qilgan bo‘lsa, o‘g‘il bolalarda esa 3-o‘rin Bekobod shahar, 2-o‘rin Toshkent tumani va 1-o‘rin Angren shahar yoshlariga nasib etdi. Tadbir so‘ngida barcha g‘olib va sovrindorlar munosib rag‘batlantirildi. Birinchilikni qo‘lga kiritgan jamoalar poytaxtimizda o‘tkaziladigan Milliy gvardiya kubogining respublika bosqichida ishtirok etishadi.