Zangiota tumanida joylashgan o‘rta taʼlim maktablarida tahsil olayotgan bitiruvchi yoshlarni kasbga yo‘naltirish, bandligini taʼminlash, bo‘sh vaqtlarini mazmunli tashkil etish,

Milliy gvardiya tizimida mavjud taʼlim sohalari va tizimga ishga qabul qilish va tushuntirishlar berish maqsadida, kuni kecha Zangiota tumani maktablar bitiruvchilari bilan “Yoshlar bilan ochiq muloqot” tadbiri bo‘lib o‘tdi.

Unda Milliy gvardiya harbiy kadrlarni tayyorlash bo‘limi, tarbiyaviy va mafkuraviy ishlar boshqarmasi masʼul ofitserlari, O‘zbekiston Yoshlar ittifoqi tuman kengashi hamda tuman Xalq taʼlimi bo‘limi xodimlari ishtirok etdi.

Tadbir tashkilotchilari tomonidan yoshlarga tizim faoliyatiga oid maʼlumotlar berildi, shu bilan birga, Jamoat xavfsizligi universiteti hamda Temurbeklar maktabi harbiy akademik litseyiga o‘qishga kirish tartibi va shart-sharoitlari to‘g‘risida ham keng va batafsil tushuntirib o‘tildi.

Yoshlar bilan ochiq va samimiy muloqot tarzida kechgan tadbir savol-javoblarga boy bo‘lib, o‘quvchilar harbiy sohaga oid maʼlumotlarga ega bo‘lishdi.

Tadbir so‘ngida, Jamoat xavfsizligi universiteti harbiy orkestri tomonidan ijro etilgan kuy-qo‘shiqlar va faxriy qorovul bo‘linmasining saf usullari, harbiylar tomonidan namoyish etilgan ko‘rgazmali chiqishlar ishtirokchilarda katta taassurot qoldirdi.

Ko‘tarinki ruhda o‘tgan tadbir o‘quvchi yoshlarga qurolli kuchlar tizimi bilan yaqindan tanishish, harbiy sohaga qiziqqan o‘quvchilarga soha vakillari bilan hamsuhbat bo‘lish imkonini yaratdi.