ЁШЛАР БИЛАН ОЧИҚ МУЛОҚОТ
Зангиота туманида жойлашган ўрта таълим мактабларида таҳсил олаётган битирувчи ёшларни касбга йўналтириш, бандлигини таъминлаш, бўш вақтларини мазмунли ташкил этиш,
Миллий гвардия тизимида мавжуд таълим соҳалари ва тизимга ишга қабул қилиш ва тушунтиришлар бериш мақсадида, куни кеча Зангиота тумани мактаблар битирувчилари билан “Ёшлар билан очиқ мулоқот” тадбири бўлиб ўтди.
Унда Миллий гвардия ҳарбий кадрларни тайёрлаш бўлими, тарбиявий ва мафкуравий ишлар бошқармаси масъул офицерлари, Ўзбекистон Ёшлар иттифоқи туман кенгаши ҳамда туман Халқ таълими бўлими ходимлари иштирок этди.
Тадбир ташкилотчилари томонидан ёшларга тизим фаолиятига оид маълумотлар берилди, шу билан бирга, Жамоат хавфсизлиги университети ҳамда Темурбеклар мактаби ҳарбий академик лицейига ўқишга кириш тартиби ва шарт-шароитлари тўғрисида ҳам кенг ва батафсил тушунтириб ўтилди.
Ёшлар билан очиқ ва самимий мулоқот тарзида кечган тадбир савол-жавобларга бой бўлиб, ўқувчилар ҳарбий соҳага оид маълумотларга эга бўлишди.
Тадбир сўнгида, Жамоат хавфсизлиги университети ҳарбий оркестри томонидан ижро этилган куй-қўшиқлар ва фахрий қоровул бўлинмасининг саф усуллари, ҳарбийлар томонидан намойиш этилган кўргазмали чиқишлар иштирокчиларда катта таассурот қолдирди.
Кўтаринки руҳда ўтган тадбир ўқувчи ёшларга қуролли кучлар тизими билан яқиндан танишиш, ҳарбий соҳага қизиққан ўқувчиларга соҳа вакиллари билан ҳамсуҳбат бўлиш имконини яратди.
