Zargarlik buyumlarini o‘g‘irlaganlikda gumon qilingan shaxs ushlandi.
Joriy yilning 23 may kuni ertalab soat taxminan 6.10 larda Xiva shahar “Qo‘riqlash” bo‘limi xodimlari biriktirilgan “Ichan-Qalʼa” davlat tarixiy-meʼmorchilik muzeyi hududini aylanib o‘tayotganda, sumka ko‘targan yigitga eʼtibor berishdi. Xodimlarni ko‘rgan fuqaro sarosimaga tushib, yashirinishga uringan,biroq tezkor harakatlar tufayli qo‘lga olingan.
Shubhali shaxsning sumkasi ko‘zdan kechirilganda,uning ichidan bir nechta qo‘lda yasalgan zargarlik buyumlari topilgan. Keyinchalik buyumlar majmuadagi do‘konlardan birining egasiga tegishli ekanligi maʼlum bo‘lgan.
Dastlabki surishtiruv ishlari natijasida huquqbuzar Xiva shahrida yashovchi, 29 yoshli J.B. ekanligi aniqlangan.
Mazkur holat bo‘yicha tergov ishlari Ichki ishlar organlari tomonidan olib borilmoqda.
