Yangiliklar

Davlatimiz Rahbarining 2018 yildagi “O‘zbekiston Respublikasi Qurolli kuchlari harbiy xizmatchilarining maʼnaviy-maʼrifiy saviyasini oshirish tizimini tubdan takomillashtirish to‘g‘risida”gi Qarorida belgilangan vazifalarning amaliy ijrosi yuzasidan bugungi kunda Milliy gvardiya tizimida ulkan islohotlar amalga oshirilmoqda.

Xususan, yoshlarining maʼnaviy-maʼrifiy saviyasini oshirish, ularning bo‘sh vaqtlarini mazmunli o‘tkazishlari uchun qulay shart-sharoitlar yaratish maqsadida Milliy gvardiya Maʼnaviyat va maʼrifat markazining  tashkil etilishi ham bu boradagi ishlarning mantiqiy davomidir.

  Ushbu majmua qoshida faoliyat yuritib kelayotgan Milliy gvardiya “Bolalar psixologiyasi markazi”ning  tajribali psixologlari tomonidan ota-ona qaramog‘idan mahrum bo‘lgan, yetim va qarovsiz qolgan, imkoniyati cheklangan bolalar, Mehribonlik uylarining sobiq va hozirgi tarbiyalanuvchilari, Toshkent shahri va Toshkent viloyatidagi Oilaviy bolalar uylari tarbiyalanuvchilari, shuningdek, patronatga olingan bolalar va ularning ota-onalariga psixologik xizmat ko‘rsatib kelinayotgani muhim ahamiyat kasb  etmoqda.

 Bugungi kunda Milliy gvardiya Maʼnaviyat va maʼrifat markazida 470 dan ortiq maʼnaviy -maʼrifiy hamda sport tadbirlari o‘tkazilib ularda 55 000 ga yaqin o‘g‘il qizlar qamrab olingan. Hozirda 1000 dan ortiq bolajonlar ushbu markazdagi 15 ga yaqin fan va sport to‘garaklarining muntazam aʼzosiga aylanishgan. Shu jumladan, respublika bo‘ylab Milliy gvardiyaning hududiy bo‘linmalarida  ham bu kabi ishlar tizimli yo‘lga qo‘yilgan.

Ayni damda Milliy gvardiya hamda Respublika Maʼnaviyat va maʼrifat markazi o‘rtasidagi o‘zaro hamkorlik memorandumining imzolanishi ham kelgusida ushbu yo‘nalishdagi amalga oshirilishi lozim bo‘lgan chora-tadbirlarni tizimli yo‘lga qo‘yish va sifat darajasini yangi bosqichga olib chiqilishi maqsad  qilib olingan. 

Shu munosabat bilan Milliy gvardiya Markaziy devoni muzokaralar o‘tkazish zalida Milliy gvardiya qo‘mondoni general-mayor R.Djurayev, Respublika Maʼnaviyat va maʼrifat markazi rahbari O.Xasanov hamda har ikkala tashkilot masʼul rahbarlari ishtirokida uchrashuv tashkil etildi.

Tadbirda dastlab, qo‘mondonning tizimdagi maʼnaviy maʼrifiy ishlar samaradorligini oshirish borasida amalga oshirilgan ishlar haqida maʼruzasi tinglandi. Unda, mazkur imzolanayotgan memorandum bir qator yo‘nalishlarni o‘zida mujassam qilib, tomonlarning o‘zaro hamkorlikda mamlakatimiz yoshlari bilan bir qatorda Milliy gvardiya harbiy xizmatchi va xodimlarining maʼnaviy-maʼrifiy salohiyatini doimiy ravishda yuksaltirib borish orqali har qanday g‘oyaviy tahdidlarga qarshi mustahkam “mafkuraviy immunitetini” shakllantirishiga xizmat qilishi qayd etildi.

Shu bilan birga, qo‘mondon tomonidan ushbu memorandum doirasida Yangi O‘zbekistonimiz kelajagi bo‘lgan o‘quvchi-yoshlarni vatanparvarlik ruhida tarbiyalashning ilmiy asoslangan yangicha yondashuvdagi tizimli ishlarni yo‘lga qo‘yish va amaliyotga tatbiq etish hamda uning ijrosi qatʼiy nazoratga olinishi zarurligi taʼkidlandi. 

Shundan so‘ng, so‘z olgan Respublika maʼnaviyat va maʼrifat markazi rahbari shu kunga qadar Milliy gvardiyaning markaz bilan hamkorlikdagi  ishlari, yutuqlari, natijalariga alohida to‘xtalib, xususan, Milliy gvardiya Maʼnaviyat va maʼrifat markazining nafaqat harbiy xizmatchi, xodimlarga, balki poytaxtimiz aholisiga eshiklari ochiq ekanligini va ayniqsa yoshlar uchun keng imkoniyatlar yaratib berilganligini guvoxi bo‘lganligini, shuningdek  mazkur binoning har bir qavatidagi o‘ziga hos vatanparvarlik tuyg‘usini aks ettiruvchi yondashuvlarga tayanib jihozlanganligini namuna sifatida ko‘rsatish mumkinligi faxr bilan tilga oldi.    

Tadbir davomida mazkur yo‘nalishdagi yechimini kutayotgan bir qator muammoli masalalar ham muhokama qilinib, kelgusida hamkorlikdagi istiqbolli chora-tadbirlar amalga oshirilishi, maktablarda o‘quvchi yoshlarning tarbiyasi hamda hozirda faoliyat yuritayotgan inspektor-psixologlarning ayni yo‘nalishdagi bilimlarini oshirish bo‘yicha har ikkala tomon mutasaddi rahbarlarining fikr-mulohazalari tinglandi.  

Haqiqatdan ham ushbu memorandum jarayoni oldingi memorandumlardan tubdan farq qilib, tomonlar o‘rtasida muhokama qilingan har bir masala ijobiy yechimini topishi uchun aniq yo‘nalishlarni o‘z ichiga olgan yo‘l xarita va reja asosida manzilli ishlar amalga oshirilishi belgilab olindi. Ijro muddatiga alohida eʼtibor qaratilib, tegishliligi bo‘yicha masʼullarga topshiriqlar berildi.

  Yuqori saviyada tashkillashtirilgan tadbir so‘ngida rahbarlar tomonidan hamkorlik memorandumi imzolandi va esdalik uchun suratga tushishdi.