O‘zbekiston Respublikasi Milliy gvardiyasi Toshkent shahri va viloyati bo‘yicha boshqarmalari ofitserlari, mutaxassis psixologlari ishtirokida axloqiy-ruhiy tayyorgarlikni tashkillashtirish bo‘yicha o‘quv mashg‘uloti o‘tkazildi.
Mazkur jangovar tayyorgarlik mashg‘ulotlari davomida harbiy xizmatchilarga ekstremal vaziyatdagi harakatlar, axloqiy-ruhiy tayyorlashning usul va vositalari tushuntirilib, real voqealikga yaqinlashtirilgan holda, 3 ta o‘quv nuqtasida ko‘rsatib berildi.
Dastavval birinchi o‘quv nuqtasida dala sharoitida ruhiy yengillashtirish xonasini jihozlash va uning ishini tashkil etish tartibi haqida maʼlumot berildi. Shundan so‘ng, maxsus taktik tayyorgarlik mashg‘ulotlari davomida sunʼiy ravishda jismoniy va ruhiy zo‘riqishlarni yaratish orqali harbiy xizmatchining jismoniy va ruhiy kuchini, uning ekstremal harakatlarga, hayot uchun haddan tashqari noqulay omillarga qarshi turish qobiliyatini sinash, iroda va qatʼiyatlikni saqlab qolish, unga qo‘yilgan jangovar vazifani oxirigacha bajarish ko‘nikmalari maxsus yo‘laklarda ko‘rgazmali tarzda bajarildi.
Ikkinchi o‘quv nuqtasida esa harbiy xizmatchilar tomonidan o‘zlariga ishonch va qatʼiyatlilikni oshirish uchun xizmat qiladigan jangovar hayqiriqlari eshitildi. Bundan tashqari o‘q otish tayyorgarligi mashg‘ulotlari jarayonida sunʼiy ravishda jismoniy va ruhiy zo‘riqishlarni yaratish orqali shaxsiy tarkibning dushmanga qarshi muvaffaqiyatli qarshi turish, bilim, ko‘nikma va malaka, jangovar mahorati va o‘ziga ishonchi namoyish etildi.
Uchinchi o‘quv nuqtasi Jamoat xavfsizligi universiteti bazasida o‘tkazildi. Unda majmuaviy to‘siqlar yo‘lagida sunʼiy ravishda barpo etilgan turli to‘siqlardan o‘tish orqali shaxsiy tarkibning axloqiy-ruhiy tayyorgarligini tashkillashtirish usullari o‘quv yig‘ini ishtirokchilariga havola etildi.
Ko‘rgazmali o‘quv yig‘ini yakunida universitet professor o‘qituvchilari ishtirokida milliy va xorijiy tajriba muhokama qilindi va kelgusi rejalar belgilab olindi.
