O‘zbekiston Respublikasi Milliy Gvardiyasi hamda Maktabgacha va maktab taʼlimi vazirligi hamkorligida respublikamiz bo‘ylab Milliy gvardiyaga biriktirilgan 56 ta maktablarning chaqiruvga qadar boshlang‘ich tayyorgarlik fani o‘qituvchilari uchun tashkil etilgan o‘quv yig‘ini bitiruvchilariga sertifikatlar topshirildi
Avval xabar berganimizdek, joriy yilning 5-9 yanvar kunlari Toshkent shahridagi “Temurbeklar maktabi” harbiy-akademik litseyida respublikamizdagi harbiy-vatanparvarlik sinflari mavjud maktablarning chaqiruvga qadar boshlang‘ich tayyorgarlik fani o‘qituvchilari uchun o‘quv yig‘ini tashkil etilgan edi.
Bugun mazkur o‘quv yig‘in yakuni munosabati bilan tantanali tadbir o‘tkazildi.
Tadbirda Milliy gvardiya qo‘mondoni polkovnik S.Mamayusupov, Maktabgacha va maktab taʼlimi vaziri o‘rinbosari D. Kenjayevlar so‘zga chiqib, bu yerda olingan bilim va ko‘nikmalar xizmat faoliyatini yana-da samarali tashkil etishda muhim o‘rin tutishini alohida taʼkidlab o‘tishdi hamda kelgusidagi ishlarida muvaffaqiyat tilashdi.
Shundan so‘ng, har bir hududdan 4 nafardan, jami 56 nafar malaka oshirgan o‘qituvchilarga sertifikatlar orkestr sadolari ostida mutasaddilar tomonidan topshirildi.
Eslatib o‘tamiz, o‘quv rejaga asosan tinglovchilarga taym menejment-vaqtni to‘g‘ri taqsimlash va boshqarish, harbiy topografiya va uning ahamiyati, jangovar – jismoniy tayyorgarlik hamda yoshlar maʼnaviyatini yuksaltirish, ularning bo‘sh vaqtlarini mazmunli tashkillashtirish bo‘yicha ham Jamoat xavfsizligi universitetining professor-o‘qituvchilari tomonidan bilimlar berildi.
Shuningdek, tinglovchilar uchun Toshkent shahrida joylashgan “G‘alaba bog‘i” yodgorlik majmuasi, “O‘zbekiston Respublikasi Qurolli Kuchlar tarixi davlat muzeyi” va “Qatag‘on qurbonlari xotirasi davlat muzeyiga” ekskursiyalar tashkil etildi.
Shuni alohida taʼkidlash joizki, o‘quv seminarda olgan bilimlar asosida fan o‘qituvchilari kelgusida Milliy Gvardiyaning hududiy bo‘limlari bilan hamkorlikda hududlardagi barcha CHQBT o‘qituvchilari uchun kaskad usulida o‘quv-yig‘inlarini davom ettirishadi.
