Ўзбекистон Республикаси Миллий Гвардияси ҳамда Мактабгача ва мактаб таълими вазирлиги ҳамкорлигида республикамиз бўйлаб Миллий гвардияга бириктирилган 56 та мактабларнинг чақирувга қадар бошланғич тайёргарлик фани ўқитувчилари учун ташкил этилган ўқув йиғини битирувчиларига сертификатлар топширилди
Аввал хабар берганимиздек, жорий йилнинг 5-9 январь кунлари Тошкент шаҳридаги “Темурбеклар мактаби” ҳарбий-академик лицейида республикамиздаги ҳарбий-ватанпарварлик синфлари мавжуд мактабларнинг чақирувга қадар бошланғич тайёргарлик фани ўқитувчилари учун ўқув йиғини ташкил этилган эди.
Бугун мазкур ўқув йиғин якуни муносабати билан тантанали тадбир ўтказилди.
Тадбирда Миллий гвардия қўмондони полковник С.Мамаюсупов, Мактабгача ва мактаб таълими вазири ўринбосари Д. Кенжаевлар сўзга чиқиб, бу ерда олинган билим ва кўникмалар хизмат фаолиятини янада самарали ташкил этишда муҳим ўрин тутишини алоҳида таъкидлаб ўтишди ҳамда келгусидаги ишларида муваффақият тилашди.
Шундан сўнг, ҳар бир ҳудуддан 4 нафардан, жами 56 нафар малака оширган ўқитувчиларга сертификатлар оркестр садолари остида мутасаддилар томонидан топширилди.
Эслатиб ўтамиз, ўқув режага асосан тингловчиларга тайм менежмент-вақтни тўғри тақсимлаш ва бошқариш, ҳарбий топография ва унинг аҳамияти, жанговар – жисмоний тайёргарлик ҳамда ёшлар маънавиятини юксалтириш, уларнинг бўш вақтларини мазмунли ташкиллаштириш бўйича ҳам Жамоат хавфсизлиги университетининг профессор-ўқитувчилари томонидан билимлар берилди.
Шунингдек, тингловчилар учун Тошкент шаҳрида жойлашган “Ғалаба боғи” ёдгорлик мажмуаси, “Ўзбекистон Республикаси Қуролли Кучлар тарихи давлат музейи” ва “Қатағон қурбонлари хотираси давлат музейига” экскурсиялар ташкил этилди.
Шуни алоҳида таъкидлаш жоизки, ўқув семинарда олган билимлар асосида фан ўқитувчилари келгусида Миллий Гвардиянинг ҳудудий бўлимлари билан ҳамкорликда ҳудудлардаги барча ЧҚБТ ўқитувчилари учун каскад усулида ўқув-йиғинларини давом эттиришади.
