Hurmatli ustoz va murabbiylar! Qadrli faxriylar!

Inson hayoti va taqdiri, jamiyat va davlat taraqqiyoti, mamlakat qudrati va millat buyukligining beqiyos kuchi – ilm-fan, taʼlim va tarbiya bo‘lib, bunda ustoz va murabbiylar alohida hurmat va ehtiromga loyiqdirlar.

Milliy tariximizning barcha davrlarida Sizlar kabi fidoyi o‘qituvchi va muallimlar eʼzozlab kelingan. Yangi O‘zbekistonni barpo etishda ham eng asosiy tayanch va suyanch aynan Siz, ustoz va murabbiylar bo‘lasiz.

Avvalo, barchangizni, sizlarning timsolingizda o‘z hayotini shunday mashaqqatli va sharafli ishga bag‘ishlagan barcha pedagoglarimizni 1-oktyabr – O‘qituvchi va murabbiylar kuni – umumxalq bayrami bilan bilan samimiy tabriklayman!

Muhtaram Prezidentimiz, Shavkat Miromonovich Mirziyoyev taʼbiri bilan aytganda, muallimning obro‘-eʼtibori – bu avvalo millatning, butun xalqning obro‘-eʼtiboridir.

Keyingi yillarda mamlakatimizda o‘qituvchi va murabbiylarning jamiyat va davlat hayotidagi o‘rni va taʼsiri sezilarli darajada kuchaytirilib, ayniqsa, yangilangan konstitutsiyamizning 52-moddasida “...o‘qituvchining mehnati jamiyat va davlatni rivojlantirish, sog‘lom, barkamol avlodni shakllantirish hamda tarbiyalash, xalqning maʼnaviy va madaniy salohiyatini saqlash hamda boyitishning asosi” sifatida eʼtirof etildi.

Atoqli jadid namoyandasi Abdulla Avloniy “Ilm dunyoning izzati, inson uchun g‘oyat oliy va muqaddas bir fazilatdir. Olim kishilar har yerda aziz va hurmatlidirlar”, - deya taʼkidlab jamiyatda ilm-fanni rivojlantirish hayot-mamot masalasi ekanligini alohida eʼtirof etgan.

 Hozirgi zamonda ham barcha jabhalarda ilm, bilim va salohiyat hayotiy zaruriyat hisoblanib, mamlakat faqatgina shu asosda taraqqiyotga erishishi, aynan ilm-fan va taʼlim kuchi bilan obro‘-eʼtibor topishi isbot talab qilmaydigan voqeʼlikdir.

Muhtaram ustoz va murabbiylar!

Fursatdan foydalanib, Milliy gvardiya tizimida faoliyat ko‘rsatib kelayotgan, Vatan va xalq manfaatlarini qatʼiy himoya qila oladigan hamda zamonaviy, keng fikrlaydigan isteʼdodli kadrlarni yetkazib berishda o‘z xissasini qo‘shib kelayotgan barcha ustoz va murabbiylarni ushbu qutlug‘ kun bilan yana bir bor chin yurakdan tabriklab, barchangizga mustahkam sog‘lik, masʼuliyatli va sharafli faoliyatingizda omad va zafarlar tilayman.