Ўзбекистон Республикаси Миллий гвардияси қўмондони генерал-майор Р.Джураевнинг «1 октябрь – Ўқитувчи ва мураббийлар куни» байрами муносабати билан байрам табриги
Ҳурматли устоз ва мураббийлар! Қадрли фахрийлар!
Инсон ҳаёти ва тақдири, жамият ва давлат тараққиёти, мамлакат қудрати ва миллат буюклигининг беқиёс кучи – илм-фан, таълим ва тарбия бўлиб, бунда устоз ва мураббийлар алоҳида ҳурмат ва эҳтиромга лойиқдирлар.
Миллий тарихимизнинг барча даврларида Сизлар каби фидойи ўқитувчи ва муаллимлар эъзозлаб келинган. Янги Ўзбекистонни барпо этишда ҳам энг асосий таянч ва суянч айнан Сиз, устоз ва мураббийлар бўласиз.
Аввало, барчангизни, сизларнинг тимсолингизда ўз ҳаётини шундай машаққатли ва шарафли ишга бағишлаган барча педагогларимизни 1 октябрь – Ўқитувчи ва мураббийлар куни – умумхалқ байрами билан билан самимий табриклайман!
Муҳтарам Президентимиз, Шавкат Миромонович Мирзиёев таъбири билан айтганда, муаллимнинг обрў-эътибори – бу аввало миллатнинг, бутун халқнинг обрў-эътиборидир.
Кейинги йилларда мамлакатимизда ўқитувчи ва мураббийларнинг жамият ва давлат ҳаётидаги ўрни ва таъсири сезиларли даражада кучайтирилиб, айниқса, янгиланган конституциямизнинг 52-моддасида “...ўқитувчининг меҳнати жамият ва давлатни ривожлантириш, соғлом, баркамол авлодни шакллантириш ҳамда тарбиялаш, халқнинг маънавий ва маданий салоҳиятини сақлаш ҳамда бойитишнинг асоси” сифатида эътироф этилди.
Атоқли жадид намояндаси Абдулла Авлоний “Илм дунёнинг иззати, инсон учун ғоят олий ва муқаддас бир фазилатдир. Олим кишилар ҳар ерда азиз ва ҳурматлидирлар”, - дея таъкидлаб жамиятда илм-фанни ривожлантириш ҳаёт-мамот масаласи эканлигини алоҳида эътироф этган.
Ҳозирги замонда ҳам барча жабҳаларда илм, билим ва салоҳият ҳаётий зарурият ҳисобланиб, мамлакат фақатгина шу асосда тараққиётга эришиши, айнан илм-фан ва таълим кучи билан обрў-эътибор топиши исбот талаб қилмайдиган воқеъликдир.
Муҳтарам устоз ва мураббийлар!
Фурсатдан фойдаланиб, Миллий гвардия тизимида фаолият кўрсатиб келаётган, Ватан ва халқ манфаатларини қатъий ҳимоя қила оладиган ҳамда замонавий, кенг фикрлайдиган истеъдодли кадрларни етказиб беришда ўз хиссасини қўшиб келаётган барча устоз ва мураббийларни ушбу қутлуғ кун билан яна бир бор чин юракдан табриклаб, барчангизга мустаҳкам соғлик, масъулиятли ва шарафли фаолиятингизда омад ва зафарлар тилайман.
