“O‘ZBEKISTONDA ETNOSPORTNI RIVOJLANTIRISH ISTIQBOLLARI” MAVZUSIDAGI XALQARO KONFERENSIYA BO‘LIB O‘TDI.
Joriy yilning 8 oktyabr kuni poytaxtimizda bo‘lib o‘tgan mazkur xalqaro konferensiya “O‘zbekistonni etnosport va milliy qadriyatlar orqali kashf eting!” shiori ostida o‘tkazildi.
Xalqaro konferensiya davomida O‘zbekistonda madaniy meroslarimizni asrash, milliy qadriyatlarimiz va urf odatlarimiz bo‘lgan milliy sport turlarini rivojlantirish va ommalashtirish davlatimiz rahbari tomonidan ilgari surilayotgan muhim tashabbuslardan biri ekanligi taʼkidlanib, bu sohadagi ishlar bugungi kunda yangi bosqichga olib chiqilayotganligi to‘g‘risida so‘z yuritildi.
O‘zbekiston Respublikasi Bosh vaziri o‘rinbosari – Turizm va sport vaziri A.Abduhakimov va Butunjahon etnosport konfederatsiyasi raisi janob Bilol Erdog‘an o‘rtasida O‘zbekiston Milliy etnosport uyushmasini tuzish va tashkil etish to‘g‘risidagi rasmiy kelishuv imzolandi va uning yangi rahbari Oybek Norinbayev tanishtirib o‘tildi.
Konferensiya davomida O‘zbekiston Respublikasi Milliy gvardiyasi qo‘mondoni-O‘zbekiston Kamondan otish federatsiyasi raisi R.Djurayev so‘zga chiqib barcha konferensiya ishtirokchilarini O‘zbekiston Etnosport assotsiatsiyasining ochilishi munosabati bilan samimiy muborakbod etdi.
Bugungi kunda Turkiya Respublikasi bilan milliy kamondan otish bo‘yicha yo‘lga qo‘yilgan yaqin hamkorlik, mamlakatimizda etnosport turlaridan biri bo‘lgan Kamondan otish sportini yana-da rivojlantirishda muhim ahamiyat kasb etishi taʼkidlanib, hozirda yurtimizda yoshlarni sportga jalb etish, ayniqsa, kamondan otish sport turini ommalashtirish yuzasidan keng qamrovli ishlar olib borilayotganligi, xususan 2021 yilning 17 iyun kuni O‘zbekiston Respublikasi Prezidenti tomonidan “Kamondan otish sport turini yana-da rivojlantirish va ommalashtirish chora-tadbirlari to‘g‘risida”gi Qarori imzolanganligiga alohida urg‘u berildi.
Ushbu qarorda iqtidorli sportchilarni saralash, buyuk ajdodlarimiz Amir Temur, Bobur Mirzo, Jaloliddin Manguberdilardan meros bo‘lgan kamondan otish anʼanalarini avlodlarga yetkazish, milliy sport turlarini ko‘paytirish, milliy terma jamoamizni Olimpiya va Paralimpiya, Osiyo va Paraosiyo o‘yinlarida, jahon chempionatlarida munosib ishtirokini taʼminlash borasida taraqqiyot yo‘nalishlari belgilab olinganligi maʼlum qilindi.
Xususan, Butunjahon etnosport konfederatsiyasi bilan hamkorlikni yana-da kuchaytirgan holda har ikki yilda Xorazm viloyatidagi Ichan qalʼa tarixiy majmuasida etnosport festivalini o‘tkazish, respublikamizning barcha hududlarida kamondan otish klublari va jamoalarini tashkil etish, Milliy hamda professional kamondan otish sport turi bo‘yicha moddiy-texnik bazasini rivojlantirish asosiy vazifalardan biri ekanligi aytib o‘tildi.
Milliy gvardiya qo‘mondoni, bugungi kunda respublikamiz bo‘ylab sportning kamondan otish turi bilan shug‘ullanmoqchi bo‘lgan havaskor yoshlarning soni juda ko‘pligi haqida taʼkidlab, qisqa vaqt ichida mamlakatimizda etnosportning yo‘nalishi bo‘lgan kamondan otish sport turini rivojlanishiga va yangi bosqichga ko‘tarilishiga, shuningdek O‘zbekiston kamonchilari xalqaro arenalarda yuqori natijalarni ko‘rsatishlariga ishonch bildirdi.
Shundan so‘ng, ushbu sohani targ‘ib qilishga qaratilgan qisqa videorolik konferensiya ishtirokchilari eʼtiboriga havola qilindi.
