Жорий йилнинг 8 октябрь куни пойтахтимизда бўлиб ўтган мазкур халқаро конференция “Ўзбекистонни этноспорт ва миллий қадриятлар орқали кашф этинг!” шиори остида ўтказилди.

    Халқаро конференция давомида Ўзбекистонда маданий меросларимизни асраш, миллий қадриятларимиз ва урф одатларимиз бўлган миллий спорт турларини ривожлантириш ва оммалаштириш давлатимиз раҳбари томонидан илгари сурилаётган муҳим ташаббуслардан бири эканлиги таъкидланиб,  бу соҳадаги ишлар бугунги кунда янги босқичга олиб чиқилаётганлиги тўғрисида сўз юритилди.

     Ўзбекистон Республикаси Бош вазири ўринбосари – Туризм ва спорт вазири А.Абдуҳакимов ва Бутунжаҳон этноспорт конфедерацияси раиси жаноб Билол Эрдоған  ўртасида Ўзбекистон Миллий этноспорт уюшмасини тузиш ва ташкил этиш тўғрисидаги расмий келишув имзоланди ва унинг янги раҳбари Ойбек Норинбаев таништириб ўтилди.

     Конференция давомида Ўзбекистон Республикаси Миллий гвардияси қўмондони-Ўзбекистон Камондан отиш федерацияси раиси Р.Джураев сўзга чиқиб барча конференция иштирокчиларини Ўзбекистон Этноспорт ассоциациясининг очилиши муносабати билан самимий муборакбод этди.  

      Бугунги кунда Туркия Республикаси билан миллий камондан отиш бўйича  йўлга қўйилган яқин ҳамкорлик,  мамлакатимизда этноспорт турларидан бири бўлган Камондан отиш спортини янада ривожлантиришда муҳим аҳамият касб этиши таъкидланиб, ҳозирда юртимизда ёшларни спортга жалб этиш, айниқса, камондан отиш спорт турини оммалаштириш юзасидан кенг қамровли ишлар олиб борилаётганлиги, хусусан 2021 йилнинг 17 июнь куни Ўзбекистон Республикаси Президенти томонидан “Камондан отиш спорт турини янада ривожлантириш ва оммалаштириш чора-тадбирлари тўғрисида”ги  Қарори имзоланганлигига алоҳида урғу берилди.

    Ушбу қарорда иқтидорли спортчиларни саралаш, буюк аждодларимиз Амир Темур, Бобур Мирзо, Жалолиддин Мангубердилардан мерос бўлган камондан отиш анъаналарини авлодларга етказиш, миллий спорт турларини кўпайтириш, миллий терма жамоамизни Олимпия ва Паралимпия, Осиё ва Параосиё ўйинларида, жаҳон чемпионатларида муносиб иштирокини таъминлаш борасида тараққиёт йўналишлари белгилаб олинганлиги маълум қилинди.

      Хусусан, Бутунжаҳон этноспорт конфедерацияси билан ҳамкорликни янада кучайтирган ҳолда ҳар икки йилда Хоразм вилоятидаги Ичан қалъа тарихий мажмуасида этноспорт фестивалини ўтказиш, республикамизнинг барча ҳудудларида камондан отиш клублари ва жамоаларини ташкил этиш, Миллий ҳамда профессионал камондан отиш спорт тури бўйича моддий-техник базасини ривожлантириш асосий вазифалардан бири эканлиги айтиб ўтилди.

    Миллий гвардия қўмондони, бугунги кунда республикамиз бўйлаб спортнинг камондан отиш тури билан шуғулланмоқчи бўлган ҳаваскор ёшларнинг сони жуда кўплиги ҳақида таъкидлаб, қисқа вақт ичида мамлакатимизда этноспортнинг йўналиши бўлган камондан отиш спорт турини ривожланишига ва янги босқичга кўтарилишига, шунингдек Ўзбекистон камончилари халқаро ареналарда юқори натижаларни кўрсатишларига ишонч билдирди.

Шундан сўнг, ушбу соҳани тарғиб қилишга қаратилган қисқа видеоролик конференция иштирокчилари эътиборига ҳавола қилинди.