Янгиликлар

АРИЗАЛАРНИ ҚАБУЛ ҚИЛИШ МУДДАТЛАРИ:

Ўзбекистон Республикаси Миллий гвардияси Ҳарбий-техник институтига (бундан буён матнда Институт деб юритилади) ўқишга кириш учун аризалар (билдиргилар) қабул йилининг 1 февралидан 1 апрелига қадар қабул қилинади.

ҚАЕРГА МУРОЖААТ ЭТИЛАДИ?

Институтга ўқишга кириш истагини билдирган фуқаролар ўзларининг яшаш жойидаги туман мудофаа ишлари бўйича бўлимларига ариза билан, ҳарбий хизматчилар эса ўз хизмат ўташ жойига тегишли равишда билдирги билан мурожаат қиладилар. ИНСТИТУТГА ЎҚИШГА КИРИШ ИСТАГИНИ БИЛДИРГАН НОМЗОДЛАР ТОМОНИДАН ҚАНДАЙ ҲУЖЖАТЛАР ТАҚДИМ ЭТИЛАДИ?

Институтга ўқишга кириш истагини билдирган номзодлар томонидан туман мудофаа ишлари бўйича бўлимларига қуйидаги ҳужжатлар тақдим этилади:

- ариза (билдирги); - паспорт нусхаси (аслини кўрсатган ҳолда); - туғилганлик ҳақида гувоҳнома нусхаси (аслини кўрсатган ҳолда);

- чақирилувчининг чақирув участкасида қайд этилганлиги тўғрисидаги гувоҳномаси ёки ҳарбий гувоҳномаси нусхаси (аслини кўрсатган ҳолда);

- номзод томонидан қўлда ёки компьютерда ёзилган таржимаи ҳол;

- номзод тўғрисидаги маълумотлар анкетаси;

- ўқиш ёки иш ёхуд хизматни ўташ жойидан тавсифнома (агар ўқиётган ёки ишлаётган ёхуд хизматни ўтаётган бўлса);

- ота-онасининг иш жойидан маълумотнома (агар ишлаётган бўлса);

- Институтда ўқишга ота-онасининг розилик хати;

- маълумоти тўғрисидаги (умумий ўрта, ўрта махсус, касб-ҳунар (ўрта махсус профессионал) ҳужжатлар ҳамда рейтинг дафтарчаси (баҳолар табели) нусхаси;

- Институтга ўқишга киришда имтиёзлардан фойдаланиш ҳуқуқини тасдиқловчи ҳужжатлар нусхаси (аслини кўрсатган ҳолда);

- 3 х 4 см ўлчамдаги 6 та рангли фотосурат (бош кийимсиз ва бурчаксиз) ҳамда 4,5 х 6 см ўлчамдаги 4 та рангли фотосурат (бош кийимсиз);

- давлат сири бўлган маълумотлар билан ишлашга рухсатномани расмийлаштириш учун зарур бўлган ҳужжатлар (махфий маълумотлар билан ишлаш учун белгиланган шаклдаги рухсатномага эга номзодлардан талаб этилмайди).

Ҳарбий хизматчи номзодлар томонидан қўшимча равишда Институтга ўқишга киришга тавсия этувчи ҳужжатлар (муддатли ҳарбий хизматни ўтаётган ҳарбий хизматчиларга - ҳарбий бўлинманинг умумий йиғилиши баённомасидан кўчирма, контракт бўйича ҳарбий хизматчиларга эса-ҳарбий қисмнинг аттестация комиссияси йиғилиш баённомасидан кўчирма) тақдим этилади.

ИНСТИТУТГА ЎҚИШГА КИРУВЧИЛАР БИЛАН ҚАНДАЙ ТАДБИРЛАР АМАЛГА ОШИРИЛАДИ?

Институтга курсантлар контингентини сифатли бутлаш максадида куйидаги тадбирлар амалга оширилади:

- ҳарбий-профессионал йўналиш;

- дастлабки танлаш;

- ҳарбий-профессионал танлаш;

- тест синовлари.

ҲАРБИЙ-ПРОФЕССИОНАЛ ЙЎНАЛИШ БЎЙИЧА ТАДБИРЛАР НИМАЛАРНИ ҚАМРАБ ОЛАДИ?

Ҳарбий-профессионал йўналиш бўйича тадбирлар ҳарбий хизматчи касбининг моҳиятини ва унга қўйиладиган талабларни очиб бериш, ёшларда ҳарбий касбни онгли равишда танлашни шакллантириш, муайян ҳарбий мутахассисликни танлашда уларга ёрдам кўрсатиш мақсадида амалга оширилади. Ҳарбий-профессионал йўналиш бўйича тадбирлар Ўзбекистон Республикаси Вазирлар Маҳкамасининг 2014 йил 3 июндаги 141-сон қарори билан тасдиқланган Ўзбекистон Республикаси олий ҳарбий таълим муассасаларига танлаш тартиби ва қабул қилиш қоидалари тўғрисидаги низомга мувофиқ амалга оширилади. Мудофаа ишлари бўйича бўлимлар ва бошқармалар ҳамда Институт ҳарбий-профессионал йуналиш бўйича тадбирларнинг амалга оширилиши учун масъул ҳисобланади.

ДАСТЛАБКИ ТАНЛАШ ТАДБИРЛАРИНИ ТАШКИЛ ЭТИШ ВА ЎТКАЗИШ ТАРТИБИ НИМАЛАРДАН ИБОРАТ?

Дастлабки танлаш тадбирлари соғлигига, индивидуал-психологик хусусиятлари ва умумжисмоний тайёргарлигига мувофиқ ҳарбий ихтисосликнинг замонавий талабларига жавоб берадиган, ички туйғу, ғоявиймаънавий барқарорликка, мустаҳкам интеллектуал ва маънавий-ахлоқий салоҳиятга эга бўлган номзодларни аниқлаш мақсадида ўтказилади. Дастлабки танлаш тадбирлари икки босқичда ўтказилади.

Биринчи босқич қабул йилининг 1 февралидан 31 мартга қадар амалга оширилади. Бунда қуйидаги тадбирлар ташкил этилади ва ўтказилади:

- ҳужжатларни тўплаш ва ўрганиш;

- якка тартибдаги суҳбат;

- бирламчи тиббий кўрик.

Иккинчи босқич қабул йилининг 1 апрелидан 31 майга қадар амалга оширилади. Бунда қуйидаги тадбирлар ташкил этилади ва ўтказилади:

- индивидуал-психологик ўрганиш;

- умумжисмоний тайёргарлик даражасини баҳолаш;

- такрорий тиббий кўрик.

Дастлабки танлаш тадбирларида иштирок этадиган номзодларнинг сони чекланмайди. Номзодларнинг ҳужжатларини тўплаш ва ўрганиш ишлари дастлабки танлаш тадбирларининг биринчи босқичи якунлангунга қадар (31 мартга қадар) амалга оширилади. Номзодларни тиббий кўрикдан ўтказиш Ўзбекистон Республикаси Президентининг 2018 йил 25 декабрдаги ПҚ-4076-сон қарори билан тасдиқланган «Ўзбекистон Республикаси Қуролли Кучларида тинчлик ва уруш даврида тиббий кўрикдан ўтказиш тўғрисидаги низом ҳамда Ўзбекистон Республикаси Қуролли Кучларида тинчлик ва уруш даврида тиббий кўрикдан ўтказишни ташкил этиш ва амалга ошириш тартиби тўғрисида»ги низомга (рўйхат рақами 3147, 2019 йил 3 апрель) мувофиқ амалга оширилади. Соғлиғининг ҳолатига кўра Институтда ўқишга яроқсиз деб ҳисобланган номзодлар дастлабки танлашнинг кейинги тадбирларига қўйилмайди. Якка тартибдаги суҳбат фуқаро ёшлар билан-туман (шаҳар) мудофаа ишлари бўйича бўлимлар бошлиқлари томонидан, ҳарбий хизматчилар биланҳарбий қисмлар (муассасалар), бўлинмаларнинг командирлари томонидан ўтказилади. Индивидуал-психологик ўрганиш қабул комиссияси таркибига киритилган мутахассис-психологлар томонидан уларни психологик тест синовидан ўтказиш йўли билан 1 апрелдан 20 майга қадар ўтказилади. Психологик тест синови натижалари бўйича қуйидаги хулосалар чиқарилади:

- Институтга кириш учун тавсия этилади;

- Институтга кириш учун тавсия этилмайди.

Психологик тест синови натижалари бўйича Институтга кириш учун тавсия этилмаган номзодлар дастлабки танлашнинг кейинги тадбирларига қўйилмайди. Умумжисмоний тайёргарлик даражасини баҳолаш комиссияси таркибига киритилган мутахассислар томонидан 1 апрелдан 20 майга қадар ўтказилади. Умумжисмоний тайёргарлик даражасини баҳолаш тадбирларида номзодлар қуйидаги машқларни бажаради:

- турникда тортилиш;

- 100 метрга югуриш;

- 3000 метрга югуриш.

Белгиланган машқларни узрсиз сабабларга кўра топширмаган ёхуд топширишдан бош тортган номзодлар қониқарсиз баҳоланади. Умумжисмоний тайёргарлик даражаси бўйича белгиланган талабларга жавоб бермаган номзодлар дастлабки танлашнинг кейинги тадбирларига қўйилмайди.

ҲАРБИЙ-ПРОФЕССИОНАЛ ТАНЛАШ ТАДБИРЛАРИНИ ЎТКАЗИШ ТАРТИБИ НИМАЛАРДАН ИБОРАТ?

Ҳарбий-профессионал танлаш тадбирлари ўзининг психофизиологик хусусиятларига ва соғлиғига кўра ҳарбий мутахассисликнинг замонавий талабларига жавоб берадиган, ҳарбийлик касбини эгаллашнинг сабабасосларига, етакчилик фазилатларига, ички туйғуга, мустаҳкам маънавий- ахлокий ва интеллектуал салоҳиятга эга бўлган номзодларни аниқлаш мақсадида ўтказилади. Ҳарбий-профессионал танлаш тадбирлари июнь ойида Институтда ўтказилади. Ҳарбий-профессионал танлаш давомида қуйидаги тадбирлар ташкил этилади ва ўтказилади:

- ҳужжатларни ўрганиш; - психофизиологик ўрганиш;

- тиббий кўрикдан ўтказиш; - ёзма иш (диктант);

- компьютер техникаси ва ахборот-коммуникация технологияларини эгаллаб олганлик даражасини текшириш;

- якка тартибдаги якуний суҳбат.

Ҳарбий-профессионал танлашнинг барча тадбирлари натижалари бўйича ўртача арифметик баҳоси 3 ва ундан юқори бўлган номзодлар Ўзбекистон Республикаси Вазирлар Маҳкамаси ҳузуридаги Давлат тест маркази томонидан ўтказиладиган тест синовларини топширишга қўйилади.

ИНСТИТУТГА ЎҚИШГА КИРИШ ИСТАГИНИ БИЛДИРГАН НОМЗОДЛАРНИНГ БЎЙИГА ҚАНДАЙ ТАЛАБЛАР ҚЎЙИЛГАН?

«Ўзбекистон Республикаси Қуролли Кучларида тинчлик ва уруш даврида тиббий кўрикдан ўтказишни ташкил этиш ва амалга ошириш тартиби тўғрисидаги низом»га (рўйхат рақами 3147, 2019 йил 3 апрель) мувофиқ 175 см. этиб белгиланган.

ИНСТИТУТДА ҚАЙСИ ТАЪЛИМ ЙЎНАЛИШЛАРИ БЎЙИЧА КАДРЛАР ТАЙЁРЛАНАДИ?

Институтда қуйидаги таълим йўналишлари бўйича офицер кадрлар тайёрланади:

1. Махсус вазифаларни бажариш қўшинларининг тактик қўмондонлиги;

2. Миллий хавфсизликни ҳуқуқий таъминлаш;

3. Хизмат фаолиятини психологик таъминлаш;

4. Аниқловчи ва қўриқловчи электрон тизимларни ташкил этиш ва фойдаланиш бўйича қўмондонлик-муҳандислиги;

5. Ишлаб чиқаришни ташкиллаштириш ва бошқаришнинг қўмондонликмуҳандислиги.

Институтни тамомлаган курсантлар лейтенант ҳарбий унвонига, бакалавр дипломига ҳамда ҳайдовчилик гувоҳномасига эга бўлади.