Миллий гвардия тизимида “Янги Ўзбекистон ёшлари, бирлашайлик” шиори остида бўлиб ўтган инглиз тили викторинасининг ғолиблари аниқланди
Ўзбекистон Республикаси Миллий гвардияси Маънавият ва маърифат марказида Миллий гвардия ҳудудий бошқармалари, Қўриқлаш бош бошқармаси, ҳарбий қисм ва таълим муассасалари терма жамоалари ўртасида анъанавий тарзда ўтказиб келинаётган “Янги Ўзбекистон ёшлари, бирлашайлик” мавзусидаги инглиз тили викторинасининг республика босқичи бўлиб ўтди.
Ўзбекистон давлат жаҳон тиллари университети ҳамда, Тошкент давлат шарқшунослик университети ўқитувчилари ҳайъатлик қилган мазкур викторинада Ўзбекистон Республикаси Жамоат хавфсизлиги университети, Миллий гвардия Қўриқлаш бош бошқармаси, Миллий гвардиянинг Бухоро, Фарғона, Навоий ҳамда Хоразм вилояти бўйича бошқармалари ҳарбий хизматчиларидан ташкил топган жамоалар билан бир қаторда Тошкент “Темурбеклар мактаби” ва Миллий гвардия Ҳарбий мусиқа академик лицейларининг ёш ва иқтидорли ўқувчиларидан ташкил топган жамоалар ғалаба учун кураш олиб борди.
Беллашувда 6 нафар иштирокчидан иборат бўлган 9 та жамоа 3 та шарт асосида беллашдилар. Жамоа аъзоларининг билим ва кўникмалари Миллий гвардия қўмондонлиги вакиллари, Ўзбекистон давлат жаҳон тиллари университетидан ташриф буюрган ўқитувчилардан ташкил топган Ҳакамлар ҳайъати томонидан адолатли баҳолаб борилди.
Жумладан, «Таништирув» шартида ҳар бир жамоа креатив ёндашган холда ўқув муассасалари ва ҳарбий қисмлари ҳақида видеороликлар, презентациялар, мусиқали фрагментлар ва ёрдамчи воситалар орқали маълумотлар беришди.
Викторинанинг иккинчи «Савол-жавоб» шартида эса жамоалар Ўзбекистон тарихи, Ўзбекистон Республикаси Конституцияси ва Ўзбекистон маданияти бўйича берилган саволларга инглиз тилида жавоб бердилар.
Беллашувнинг учинчи шарти “Сардорлар беллашуви” бўлиб, сардорлар Жадидчилик ва унинг асосчилари ҳақида инглиз тилида оғзаки сўзлаб бердилар.
Айнан иштирокчилардаги юқори савия ва шартларга пухта тайёргарлик ҳакамлар учун мутлоқ ғолиб жамоани аниқлашда қийинчилик туғдирди.
Якуний натижаларга кўра, викторина шоҳсупасининг учинчи поғонасини Тошкент Темурбеклар мактаби ҳарбий-академик лицейининг “Ёунг Темуридс” жамоаси, иккинчи поғонасини эса Миллий гвардия Ҳарбий мусиқа академик лицейининг ёш ва иқтидорли ўқувчиларидан ташкил топган “Перфест генератион” жамоаси эгаллади. Мусобақа ғолиби деб Ўзбекистон Республикаси Жамоат хавфсизлиги университетининг “Тҳе Инвинсиблес” жамоаси топилди.
Викторина натижалари эълон қилингач фахрли ўрин соҳиблари ва мусобақа ғолибларига кубок ва қимматбаҳо совғалар топширилди.
Бундан ташқари, викторинада фаол иштирок этган ЭВEРEСТ ва «РEНEСАНС» жамоалари сардорлари смартфон телефон ва диплом билан тақдирланди.
Шунингдек, жамоаларнинг билимларини баҳолашда яқиндан ёрдам берган ҳайъат аъзоларига Миллий гвардия қўмондонлигининг ташаккурномалари топширилди.
