2023 yil 11 iyul kuni qabul qilingan Oʻzbekiston Respublikasining “Ekologiya va jamoat tartibini saqlash sohalaridagi qonunchilik takomillashtirilishi munosabati bilan Oʻzbekiston Respublikasining ayrim qonun hujjatlariga oʻzgartish va qoʻshimchalar kiritish toʻgʻrisida”gi Qonuni joriy yil 13 oktabr kunidan kuchga kirdi va Milliy gvardiya organlariga ushbu Qonun bilan bir qator vakolatlar va vazifalar belgilab berildi. Ushbu Qonunda belgilangan qoidalarni fuqarolarga tushuntirish va mazmun mohiyatini targʻibot qilish maqsadida Oʻzbekiston Respublikasi Milliy gvardiyasi tizimida “Ekologiya va atrof-muhitni muhofaza qilish sohasida huquqbuzarliklarning oldini olish” mavzusida harbiy xizmatchilar va xodimlar oʻrtasida “Eng yaxshi matbuot xizmati” tanlovi oʻtkazildi.
Tanlovda Respublika miqyosida Milliy gvardiya tizimidagi Axborot xizmatlari harbiy xizmatchilari va xodimlari ishtirok etishdi. 100 dan ortiq telemateriallar tanlov tashkiliy qoʻmitasiga kelib tushdi.
Tanlov gʻoliblari Milliy gvardiya, Ekologiya, atrof-muhitni muhofaza qilish va iqlim oʻzgarishi vazirligi, Sanitariya-epidemiologiya xizmati, Milliy teleradiokompaniya mutaxassislaridan tashkil topgan Hayʼat aʼzolari tomonidan aniqlandi.
Tanlovning tantanali taqdirlash marosimida Milliy gvardiya qoʻmondoni oʻrinbosari polkovnik S.Mamayusupov ishtirok etib, mazkur tanlovning mavzusi naqadar dolzarb ekanligini taʼkidlab oʻtdi.
Shundan soʻng, “Eng yaxshi matbuot xizmati” tanlovining 1-oʻriniga sazovor boʻlgan Milliy gvardiya Toshkent shahri boʻyicha boshqarmasi Matbuot xizmati, 2-oʻrinni qoʻlga kiritgan Milliy gvardiya Qoraqalpogʻiston Respublikasi boʻyicha boshqarmasi Qoʻriqlash boshqarmasi Axborot xizmati va 3-oʻringa loyiq deb topilgan Milliy gvardiya Fargʻona viloyati boʻyicha boshqarmasi Axborot xizmatlari harbiy xizmatchi va xodimlariga 1,2,3-darajali Diplom va qimmatbaho sovgʻalar topshirildi.
Shuningdek, “Eng yaxshi videorolik”, “Eng yaxshi koʻrsatuv, video (hujjatli) film”, “Eng yaxshi telelavha, reportaj” nominatsiyalari boʻyicha gʻolib deb topilgan Andijon, Navoiy viloyatlari va Toshkent shahri qoʻriqlash boshqarmalari Axborot xizmatlari xodimlari ham munosib ravishda ragʻbatlantirildi.
Tadbir Milliy gvardiya Ashula va raqs ansambli xushovoz xonandalarining bayramona kuy qoʻshiqlari bilan nihoyalandi.