Surxon vohasida azaldan yilqichilik yaxshi rivojlangan, xonadonlarda Qorabayir zotli otlarni boqishga aholining qiziqishi katta. Yurtimizda keng tadbiq etilayotgan zamonaviy ot sport turlarini aholi o‘rtasida ommalashtirish, yoshlarni tulporlarga bo‘lgan mehrini oshirish uchun esa vohalik chavondozlarning tavsiya va ko‘maklari juda muhim. Ayni shu maqsadda, Milliy gvardiya Surxondaryo viloyati Qo‘riqlash boshqarmasi xodimlari tomonidan hududlardagi nomdor chobog‘onlarning faoliyati o‘rganilib, yoshlarga namuna qilib ko‘rsatilmoqda. Surxondaryo viloyati Jarqo‘rg‘on tumani “Bobotog‘” mahallasida yashovchi “Abdu” chobog‘onni yurtdoshlarimiz juda yaxshi taniydi. Asl ismi Abdumurot Shoyimov bo‘lgan chavondoz farzandlari bilan birgalikda, mana bir necha yildan buyon qorabayir zotli otlarni ko‘paytirish, ularni uloq-ko‘pkari musobaqalariga tayyorlash bilan shug‘ullanib keladi. – Bugun Milliy gvardiya xodimlari bir guruh yoshlar bilan xonadonimizga kelganidan yana-da ruhlandim – deydi, “Abdu” chobog‘onning o‘g‘li Sunnatillo Tog‘aymurodov. – Mahalladagi ushmagan yoshlarning, otni parvarishlash, uni minishga bo‘lgan ishtiyoqi menga katta taassurot qoldirdi. Hozirda xonadonimizda qorabayir zotli 5 bosh katta uloqchi otlar hamda 2 bosh toyimiz mavjud. Oilamiz bilan mana shu otlarga mehr berganmiz. “Ot – er yigitning qanoti” deb bejizga aytishmaydi. Albatta, otning xususiyatlari ko‘p, uni minishda esa kishida mardlik va chapdastlik talab etiladi.

Tadbir davomida xodimlar, Prezidentimizning "Yilqichilik va ot sportini yana-da rivojlantirish hamda zamonaviy beshkurash va polo sport turini ommalashtirish bo‘yicha qo‘shimcha chora-tadbirlar to‘g‘risida"gi Qarori mazmun-mohiyatini tushuntirishdi. Chavondozlar bilan hamkorlikda, tumanda ot sportiga ixtisoslashgan seksiyalarni tashkil etish, unda o‘g‘il-qizlarni jalb etish borasidagi ishlar kelishib olindi.