JASORATINGIZNI VATAN SHARAFLAYDI
Ikkinchi jahon urushi dahshatlarining guvohi va ishtirokchisi bo‘lgan qahramonlar safi tobora kamayib bormoqda. Ularni qadrlash va yo‘qlash har bir insonning burchidir. 9-may Xotira va qadrlash kuni munosabati bilan joylarda turli tadbirlar va faxriylar xonadoniga tashriflar uyushtiriladi. Xususan, kuni kecha Milliy gvardiya Toshkent shahri bo‘yicha boshqarmasi harbiy xizmatchilari tomonidan Chilonzor tumanida istiqomat qiluvchi Ganiyev Abdujalil ota xolidan xabar olindi. Bolaligi urushning sururli yillarida o‘tgan qahramonimiz ayni kunlarda farzandlari, nevaralari davrasida keksalik gashtini surmoqda.
Yuzma-yuz suhbat chog‘ida urush faxriysi dunyo xalqlari boshiga musibat solgan mashʼum urush, o‘sha og‘ir kunlarni matonat bilan yengib o‘tgan ota-bobolarimizning yengilmas irodasi, cheksiz matonati haqida so‘zlab berdi. Yoshlarga bugungi tinch-osoyishta kunlarga osonlikcha erishilmagani, uni ko‘z qorachig‘idek asrab-avaylash lozimligi yurtimizda yaratilgan sharoit va imkoniyatlardan to‘la foydalangan holda chuqur bilim olish, yaxshi kasb egasi bo‘lish, shu orqali Vatanimiz taraqqiyoti uchun hissa qo‘shish yosh avlodning muqaddas burchi ekanligini taʼkidladi.
Tashrif so‘ngida Abdujalil ota ko‘rsatilgan eʼtibor va tashrifdan minnatdor ekanligini, bugungi tinch va farovon hayotimizning qadriga yetgan holda, uni ko‘z qorachig‘imizdek asrab-avaylash kerakligini aytib o‘tdi.
