Mazkur yig‘ilishda Milliy gvardiya qo‘mondonligi, tizimdagi tarkibiy va hududiy boshqarma, bo‘lim, xizmat boshliqlari, taʼlim muassasa rahbarlari hamda sohaga oid mutasaddilar  ishtirok etishdi.

Yig‘ilish avvalida Milliy gvardiya qo‘mondoni general-mayor R.Djurayev O‘zbekiston Respublikasi Prezidenti, Qurolli Kuchlar Oliy Bosh qo‘mondoni Shavkat Mirziyoyev raisligida o‘tkazilgan Xavfsizlik kengashining kengaytirilgan yig‘ilishida belgilab berilgan ustuvor vazifalarga to‘xtalib o‘tdi. 

 Shundan so‘ng 2023 yil davomida tizimda amalga oshirilgan keng ko‘lamli ishlar hamda yo‘l qo‘yilgan kamchiliklar sarhisob qilinib, shaxsiy tarkib o‘rtasida harbiy intizomni mustahkamlash, huquqbuzarliklar profilaktikasi samaradorligini oshirish borasidagi muhim masalalar muhokama qilindi.

Harbiy xizmatchi va xodimlarning shaxsiy masʼuliyatini oshirish borasida qatʼiy tartib intizom va tanqidiy tahlil olib borishni kundalik meʼyorga aylantirish yuzasidan barcha mansabdor shaxslarga topshiriqlar berildi.

Milliy gvardiya qo‘mondoni Davlatimiz rahbarining doimo eʼtibor markazida bo‘lgan yoshlar siyosati, tizim oldidagi ustuvor vazifalardan biri bo‘lib qolishini aytib, mazkur yo‘nalishdagi vazifalarni barchamiz bir tanu bir jon bo‘lib bajarishimiz shartligini taʼkidladi.

 Shuningdek, yoshlarni harbiy vatanparvarlik ruhida tarbiyalash, ularning maʼnaviy-axloqiy tarbiyasini to‘g‘ri shakllantirish, ommaviy sportga jalb qilish hamda bandligini taʼminlash orqali turli tahdidlardan himoya qilishga qaratilgan chora-tadbirlarni kuchaytirish borasida mutasaddi rahbarlarga aniq vazifalar belgilab berildi.