G‘OLIBLAR TAQDIRLANDI VA FUNKSIONAL KO‘PKURASH SPORT TURINI YANADA RIVOJLANTIRISH BORASIDA VAZIFALAR BELGILAB OLINDI
4 dekabr kuni O‘zbekiston Funksional ko‘pkurash federatsiyasida uchrashuv bo‘lib o‘tdi. Unda joriy yilning 26-28 noyabr kunlari Novosibirsk shahrida bo‘lib o‘tgan Mustaqil davlatlar hamdo‘stligi sportchilari o‘rtasida o‘tkazilgan "SIBERIAN SHOWDOWN" xalqaro turnirida faol ishtirok etgan sportchilarimiz D. Siniskiy va R. Gazizulin Federatsiyaning esdalik sovg‘alari va pul mukofoti bilan taqdirlandi.
Shuningdek, Federatsiya rahbariyati "Buka Gym" o‘quv markazi direktori G. Davlatova hamda “BeFit” sport klubi murabbiyi E. Muxsimovalarga Funksional ko‘pkurash bo‘yicha sportchilarni tayyorlashda qo‘shgan hissa uchun o‘z minnatdorchiligini bildirdi.
Shu bilan birga, 2022 yilda funksional ko‘pkurash sport turini yana-da rivojlantirish, aholi orasida ommalashtirish va yurtimizda nufuzli musobaqalarni o‘tkazish bo‘yicha istiqbolli rejalar atroflicha muhokama qilindi.
