Olmazor tumanidagi “Yosh gvardiyachilar” bolalar va o‘smirlar sport maktabi yangidan taʼmirlanib, foydalanishga topshirildi
O‘zbekiston Respublikasi Vazirlar Mahkamasining 2022 yil 2 fevraldagi 50-son Qaroriga asosan, Toshkent shahar Olmazor tumanidagi Bolalar va o‘smirlar sport maktabi Milliy gvardiya tasarrufiga o‘tkazilib, uning negizida “Yosh gvardiyachilar” bolalar va o‘smirlar sport maktabi tashkil etildi.
Mazkur muassasada bir yil ichida sport seksiyalari soni 7 tadan 13 taga, olimpiya sport turlari bo‘yicha to‘garaklar 3 tadan 6 taga, sport bo‘limlari soni 8 tadan 12 taga, umumiy guruhlar soni 30 tadan 51 taga oshirildi.
Shuningdek, sportning “Voleybol”, “Kamondan otish”, “Qo‘l jangi” va “Slalomda eshkak eshish” turlari bo‘yicha yangi seksiyalar tashkil etildi. Ularda shug‘ullanuvchi yoshlar soni 210 nafardan 544 nafarga yetib, shundan 151 nafarini qizlar tashkil etadi.
Shuni alohida taʼkidlash joizki, Milliy gvardiya Toshkent shahar Qo‘riqlash boshqarmasi tomonidan birinchi bosqichda ushbu sport maktabining moddiy-texnik bazasi mustahkamlanishi, qo‘shimcha sport maydonchalari qurilishi va taʼmirlanishi natijasida maktab imkoniyatlari yana-da oshdi. Endilikda mazkur sport majmuasida nafaqat sportchilar balki mahalla yoshlari ham sport bilan muntazam shug‘ullanishlari uchun imkon yaratildi.
Muassasaning yangi taʼmirlangan sport maydonchalarining foydalanishga topshirilishi munosabati bilan, zamonaviy ko‘rinishda qayta barpo etilgan stadionda Milliy gvardiya qo‘mondonligi, Yoshlar ishlari va sport vazirligi, Olmazor tumani hokimligi, tuman sektor rahbarlari va mahalliy kengash deputatlari, nuroniylar, mahalla yoshlari hamda 22-sonli Mehribonlik uyi tarbiyalanuvchilari ishtirokida katta tadbir bo‘lib o‘tdi.
Tadbirda so‘z olganlar Prezidentimiz rahbarligida yoshlarni sportga keng jalb etish, ularning sport bilan shug‘ullanishlari uchun munosib shart-sharoitlarni yaratish borasida amalga oshirilayotgan isloxotlarni alohida eʼtirof etdilar.
Shuningdek, mutasaddilar tomonidan tez orada muassasada qayta qurish ishlarining ikkinchi bosqichiga start berilib, yopiq sport majmuasi va maktabning maʼmuriy binosini zamonaviy andozalar asosida taʼmirdan chiqarilishi alohida taʼkidlab o‘tildi.
Shundan so‘ng, Milliy gvardiya qo‘mondoni buyrug‘i bilan “Fidoyi xodim” ko‘krak nishoni, esdalik qo‘l soati hamda faxriy yorliqlar bilan bir guruh hamkor tashkilotlar vakillari, xizmat ko‘rsatgan ustoz-murabbiylar hamda sportchilar taqdirlandi.
Tadbirning badiiy qismida Milliy gvardiya Maʼnaviyat va maʼrifat markazining xushovoz xonandalari va go‘zal raqqosalari tomonidan tayyorlangan konsert dasturi tashkil etildi.
Milliy gvardiya Harbiy musiqa akademik litseyi o‘quvchilari tomonidan ijro etilgan musiqa asarlari, O‘zbek jang sanʼati yoshlarining ko‘rgazmali chiqishlari o‘g‘il-qizlarda katta taassurot qoldirdi.
Konsert so‘ngida, barcha masʼul rahbarlar maktab hududida zamonaviy talablarga javob beradigan yangi voleybol, basketbol maydonlari, uzunlikka sakrash, vorkaut mashg‘ulotlari uchun barpo etilgan maxsus joylar, qayta taʼmirdan chiqqan futbol maydonlari, gimnastika, turon yakka kurashi, taekvando, unversal jang sanʼati kabi mashg‘ulot joylarini ko‘zdan kechirib, yosh sportchilar bilan suhbatlashdilar.
