Олмазор туманидаги “Ёш гвардиячилар” болалар ва ўсмирлар спорт мактаби янгидан таъмирланиб, фойдаланишга топширилди
Ўзбекистон Республикаси Вазирлар Маҳкамасининг 2022 йил 2 февралдаги 50-сон Қарорига асосан, Тошкент шаҳар Олмазор туманидаги Болалар ва ўсмирлар спорт мактаби Миллий гвардия тасарруфига ўтказилиб, унинг негизида “Ёш гвардиячилар” болалар ва ўсмирлар спорт мактаби ташкил этилди.
Мазкур муассасада бир йил ичида спорт секциялари сони 7 тадан 13 тага, олимпия спорт турлари бўйича тўгараклар 3 тадан 6 тага, спорт бўлимлари сони 8 тадан 12 тага, умумий гуруҳлар сони 30 тадан 51 тага оширилди.
Шунингдек, спортнинг “Волейбол”, “Камондан отиш”, “Қўл жанги” ва “Слаломда эшкак эшиш” турлари бўйича янги секциялар ташкил этилди. Уларда шуғулланувчи ёшлар сони 210 нафардан 544 нафарга етиб, шундан 151 нафарини қизлар ташкил этади.
Шуни алоҳида таъкидлаш жоизки, Миллий гвардия Тошкент шаҳар Қўриқлаш бошқармаси томонидан биринчи босқичда ушбу спорт мактабининг моддий-техник базаси мустаҳкамланиши, қўшимча спорт майдончалари қурилиши ва таъмирланиши натижасида мактаб имкониятлари янада ошди. Эндиликда мазкур спорт мажмуасида нафақат спортчилар балки маҳалла ёшлари ҳам спорт билан мунтазам шуғулланишлари учун имкон яратилди.
Муассасанинг янги таъмирланган спорт майдончаларининг фойдаланишга топширилиши муносабати билан, замонавий кўринишда қайта барпо этилган стадионда Миллий гвардия қўмондонлиги, Ёшлар ишлари ва спорт вазирлиги, Олмазор тумани ҳокимлиги, туман сектор раҳбарлари ва маҳаллий кенгаш депутатлари, нуронийлар, маҳалла ёшлари ҳамда 22-сонли Меҳрибонлик уйи тарбияланувчилари иштирокида катта тадбир бўлиб ўтди.
Тадбирда сўз олганлар Президентимиз раҳбарлигида ёшларни спортга кенг жалб этиш, уларнинг спорт билан шуғулланишлари учун муносиб шарт-шароитларни яратиш борасида амалга оширилаётган ислохотларни алоҳида эътироф этдилар.
Шунингдек, мутасаддилар томонидан тез орада муассасада қайта қуриш ишларининг иккинчи босқичига старт берилиб, ёпиқ спорт мажмуаси ва мактабнинг маъмурий биносини замонавий андозалар асосида таъмирдан чиқарилиши алоҳида таъкидлаб ўтилди.
Шундан сўнг, Миллий гвардия қўмондони буйруғи билан “Фидойи ходим” кўкрак нишони, эсдалик қўл соати ҳамда фахрий ёрлиқлар билан бир гуруҳ ҳамкор ташкилотлар вакиллари, хизмат кўрсатган устоз-мураббийлар ҳамда спортчилар тақдирланди.
Тадбирнинг бадиий қисмида Миллий гвардия Маънавият ва маърифат марказининг хушовоз хонандалари ва гўзал раққосалари томонидан тайёрланган концерт дастури ташкил этилди.
Миллий гвардия Ҳарбий мусиқа академик лицейи ўқувчилари томонидан ижро этилган мусиқа асарлари, Ўзбек жанг санъати ёшларининг кўргазмали чиқишлари ўғил-қизларда катта таассурот қолдирди.
Концерт сўнгида, барча масъул раҳбарлар мактаб ҳудудида замонавий талабларга жавоб берадиган янги волейбол, баскетбол майдонлари, узунликка сакраш, воркаут машғулотлари учун барпо этилган махсус жойлар, қайта таъмирдан чиққан футбол майдонлари, гимнастика, турон якка кураши, таэквандо, унверсал жанг санъати каби машғулот жойларини кўздан кечириб, ёш спортчилар билан суҳбатлашдилар.
