Kuni kecha O‘zbekiston Respublikasi Milliy gvardiyasi hamda Ot sporti federatsiyasi bilan hamkorlikda mustaqilligimizning 31 yilligi munosabati bilan "Universal Jumping Agro" Ot sporti klubida professional yoshlar o‘rtasida to‘siqlardan sakrash turi bo‘yicha musobaqa o‘tkazildi.

Mazkur musobaqada ishtirokchilar uch yo‘nalishda:

balandligi 100 sm, 110sm hamda 120sm bo‘lgan to‘siqlardan sakrash bo‘yicha o‘z imkoniyatlarini sinab ko‘rishdi.

Bellashuv qizg‘in va shiddatli lahzalarga boy bo‘ldi. To‘siqlardan sakrash jarayonida ishtirokchilar bor mahoratlarini namoyish etib, eng yuqori ko‘rsatgichlar sari intildilar.

Yigitlar bilan bir xil natijalarni ko‘rsatgan sportchi qizlar tomoshabinlarning hayrati va olqishlariga sazovor bo‘ldi.

Ushbu yo‘nalishlar bo‘yicha mutlaq g‘oliblikni Ro‘zmuxamedov Bekzod hamda Sergey Antonovich qo‘lga kiritib, kubok,diplom, medal hamda esdalik sovg‘alar bilan taqdirlandi.

Shuningdek kunning ikkinchi yarmida Toshkent viloyatida joylashgan "O‘zbegim otlari ot zavodi"maydonida Ot poygasi va yoshlar uchun sport musobaqalari tashkil etildi.Musobaqalarda ishtirok etish uchun Toshkent viloyati Chirchiq shahrida joylashgan mehribonlik uyi tarbiyalanuvchilari, muddatli harbiy xizmatchilar va hududiy chavandozlar maktabi o‘quvchilari taklif etildi. Sport tadbirini bayramona o‘tishida Jamoat xavfsizligi universiteti orkestr jamoasi o‘z hissasini qo‘shdi. Arqon tortish, shaxmat shashka, tennis, tosh ko‘tarish kabi bellashuvlar ham yoshlarda katta taassurot qoldirdi. JXU kursantlarining qo‘l jangi chiqishlari o‘quvchilarda harbiy vatanparvarlik ruhini oshirishga xizmat qildi. Ot poygalari ham murosasiz o‘tgaligi bilan esda qoladigan bo‘ldi.