ОТ СПОРТИНИНГ ТЎСИҚЛАРДАН САКРАШ ТУРИ БЎЙИЧА ЖАҲОН КУБОГИ ЕВРООСИЁ САРАЛАШ ЛИГАСИНИНГ БИРИНЧИ БОСҚИЧИ ЎТКАЗИЛДИ
Айни кунларда Жаҳон кубоги учун Евроосиё саралаш лигасининг биринчи босқичи бўлиб ўтди. Мазкур йирик ва нуфузли мусобақада Ўзбекистон Республикаси пойтахти Тошкент шаҳри мезбонлик қилди. Мусобақага Россия, Қирғизистон, Қозоғистон, Польша, Арманистон, Белоруссия, Украина, Покистон, Германия, Голландия ва Дубаи давлатларидан чавандозлар, мураббийлар, ҳакамлар ва ветеринар шифокорлар ташриф буюришди.
Мусобақа мобайнида чавандозлар тўсиқлардан сакрашнинг еттита тоифаси бўйича беллашдилар. Ҳеч муболағасиз, дунёнинг энг сара чавандозлари чиқишини юқори малакали ҳакамлар ҳайъати ва от спорти соҳаси соҳасидаги экспертлар диққат-эътибор билан кузатишди.
Ушбу мусобақада Ўзбекистон Республикаси Миллий гвардияси от спорти бўйича республика олий спорт маҳорати мактабининг чавандозлари иштирок этиб, ватанимиз шаънини муносиб ҳимоя қилишди.
Беллашув сўнгида Ўзбекистон Республикаси Миллий гвардияси Фахрий қоровул батальони байроқдорлари ҳамда Миллий гвардия оркестрининг иштироки тадбирга янада кўркамлик, нуфуз ва кўтаринки кайфият бағишлади.
Қизғин ва муросасиз кечган мусобақа натижаларига кўра ғолибликни қўлга киритган чавандоз спортчилар ташкилотчилар томонидан кубок, медаль ва эсдалик совғалари билан муносиб рағбатлантирилди.
