O’zbekiston Respublikasi Milliy gvardiyasi harbiy xizmatchilari AQShning Missisipi shtatida har yili an'anaviy tarzda o‘tkazib kelinayotgan "ENG ILG'OR JANGCHI - 2025" musobaqasida ilk bor ishtirok etib, eng yuqori natijalarni qo‘lga kiritgan holda mamlakatimizga qaytib kelishdi.
Musobaqa joriy yilning 17-21 mart kunlari AQShning Missisipi shtati Kemp Shelbi bazasida bo‘lib o‘tdi va unda qatnashgan 20 ta jamoalar orasida O‘zbekiston Respublikasi Mudofaa vazirligi va Milliy gvardiya jamoalari ham munosib ishtirok etishdi.
Xalqaro harbiy hamkorlik aloqalarini mustahkamlash va maxsus bo‘linmalarda xizmat qilish nufuzini oshirish kabi maqsadlarda tashkil etilgan mazkur musobaqada ishtirok etgan O‘zbekiston Milliy gvardiyasi harbiy xizmatchilari AQSh Milliy gvardiyasining maxsus bo‘linmalaridan ishtirok etgan 20 ta jamoalar bilan kuch sinashishdi.
Musobaqa davomida harbiy xizmatchilarimiz katta serjant va kichik serjant nominasiyalari bo‘yicha yakka tarkibda jismoniy tayyorgarlik sinovlari xususan, jismoniy va ruhiy zo‘riqish yo‘lagidan o‘tish, tunda 15 kilometr masofaga orientirlash, 15 kilogramm yuk bilan 20 kilometr masofaga marsh yugurish, jangovar va umumiy tayyorgarlik bo‘yicha test sinovlari, insho yozish (harbiy hamkorlik mavzusida 500 tadan kam bo‘lmagan so‘z), artilleriya olovini boshqarish, AQSh namunasidagi o‘qotar qurollarni noto‘liq qismlarga yoyish, yig‘ish va jangovar holatga keltirish, shuningdek, ulardan turli usul va sharoitlarda o‘q otish, tibbiy tayyorgarlik, ommaviy qirg‘in qurollaridan himoyalanish, kutilmagan nostandart vaziyatlardagi mashqlar kabi shartlarni muvaffaqiyatli bajarib ishtirok etgan Milliy gvardiya bo‘linmalari orasida eng yuqori natijalarga erishib, 1-o'rinni qo'lga kiritishdi.
O‘zbekiston jamoalari ishtiroki va erishgan natijalari musobaqa tashkilotchilari tomonidan yuqori baholanib, O‘zbekiston Respublikasi Qurolli Kuchlari tizimida amalga oshirilayotgan keng ko‘lamli islohotlarning samarasi deya e'tirof etildi va yuqori natijalar ko‘rsatgan harbiy xizmatchilarimiz “NAMUNALI XIZMATLARI UCHUN” medali va “YIL ILG‘OR JANGCHISI” ramzi bilan taqdirlandi.
Joriy yilning 23 mart kuni harbiy xizmatchilarimiz Islom Karimov nomidagi Toshkent xalqaro aeroportida tantanali ravishda kutib olindilar.
