Ўзбекистон Республикаси Миллий гвардияси ҳарбий хизматчилари АҚШнинг Миссисипи штатида ҳар йили анъанавий тарзда ўтказиб келинаётган "ЭНГ ИЛҒОР ЖАНГЧИ - 2025" мусобақасида илк бор иштирок этиб, энг юқори натижаларни қўлга киритган ҳолда мамлакатимизга қайтиб келишди.
Мусобақа жорий йилнинг 17-21 март кунлари АҚШнинг Миссисипи штати Кемп Шелби базасида бўлиб ўтди ва унда қатнашган 20 та жамоалар орасида Ўзбекистон Республикаси Мудофаа вазирлиги ва Миллий гвардия жамоалари ҳам муносиб иштирок этишди.
Халқаро ҳарбий ҳамкорлик алоқаларини мустаҳкамлаш ва махсус бўлинмаларда хизмат қилиш нуфузини ошириш каби мақсадларда ташкил этилган мазкур мусобақада иштирок этган Ўзбекистон Миллий гвардияси ҳарбий хизматчилари АҚШ Миллий гвардиясининг махсус бўлинмаларидан иштирок этган 20 та жамоалар билан куч синашишди.
Мусобақа давомида ҳарбий хизматчиларимиз катта сержант ва кичик сержант номинациялари бўйича якка таркибда жисмоний тайёргарлик синовлари хусусан, жисмоний ва руҳий зўриқиш йўлагидан ўтиш, тунда 15 километр масофага ориентирлаш, 15 килограмм юк билан 20 километр масофага марш югуриш, жанговар ва умумий тайёргарлик бўйича тест синовлари, иншо ёзиш (ҳарбий ҳамкорлик мавзусида 500 тадан кам бўлмаган сўз), артиллерия оловини бошқариш, АҚШ намунасидаги ўқотар қуролларни нотўлиқ қисмларга ёйиш, йиғиш ва жанговар ҳолатга келтириш, шунингдек, улардан турли усул ва шароитларда ўқ отиш, тиббий тайёргарлик, оммавий қирғин қуролларидан ҳимояланиш, кутилмаган ностандарт вазиятлардаги машқлар каби шартларни муваффақиятли бажариб иштирок этган Миллий гвардия бўлинмалари орасида энг юқори натижаларга эришиб, 1-ўринни қўлга киритишди.
Ўзбекистон жамоалари иштироки ва эришган натижалари мусобақа ташкилотчилари томонидан юқори баҳоланиб, Ўзбекистон Республикаси Қуролли Кучлари тизимида амалга оширилаётган кенг кўламли ислоҳотларнинг самараси дея эътироф этилди ва юқори натижалар кўрсатган ҳарбий хизматчиларимиз “НАМУНАЛИ ХИЗМАТЛАРИ УЧУН” медали ва “ЙИЛ ИЛҒОР ЖАНГЧИСИ” рамзи билан тақдирланди.
Жорий йилнинг 23 март куни ҳарбий хизматчиларимиз Ислом Каримов номидаги Тошкент халқаро аэропортида тантанали равишда кутиб олиндилар.
