O‘zbekiston va Saudiya Arabistoni Milliy gvardiyalari o‘rtasida do‘stona hamkorlik aloqalari mustahkamlanmoqda
Saudiya Arabistoni Podshohligi Milliy gvardiyasi vazirligi Harbiy apparat boshlig‘i general-leytenant Solih bin Abdurahmon al-Harbiy boshchiligidagi delegatsiya rasmiy tashrif bilan O‘zbekistonda bo‘ldi.
Milliy gvardiya qo‘mondoni general-mayor R.Djurayev tomonidan mehmonlar Markaziy devonda munosib kutib olindi. Mazkur uchrashuv o‘zaro hamkorlik va tajriba almashish borasidagi muhim qadamlardan biri bo‘ldi.
Dastavval, delegatsiya a’zolari Milliy gvardiya tarixi muzeyiga tashrif buyurib, tizim tarixiga oid boy ma’lumotlar, eksponatlar va gvardiyaning shakllanish bosqichlari bilan yaqindan tanishdilar.
Shundan so‘ng, ikki tomon o‘rtasida muzokaralar bo‘lib o‘tdi. Uchrashuvda sohadagi tarixiy va bugungi kundagi zamonaviy vazifalarning o‘xshashlik jihatlari muhokama qilinib, istiqbolli rejalar hamda hamkorlik mexanizmlari yuzasidan fikr almashildi.
Xususan, jamoat tartibini saqlash va xavfsizlikni ta’minlash sohasidagi vazifalar, har ikki davlatda tarixiy obidalarni ziyorat qilish va turizm sohasini rivojlantirishda xavfsizlikni ta’minlash borasida Milliy gvardiyaning muhim o‘rni va unda innovatsion texnologiyalardan jumladan dron va antidronlardan samarali foydalanish, maxsus bo‘linmalar o‘rtasida mashg‘ulotlar va treninglar tashkil etish hamda malakali kadrlarni tayyorlash borasida tajriba almashish kabi masalalar muhokama qilindi.
Shuningdek, ushbu uchrashuv kelgusidagi hamkorlik uchun muhim poydevor bo‘lib xizmat qilishi ta’kidlanib, do‘stona munosabatlarni mustahkamlash hamda yanada rivojlantirish bo‘yicha kelishuvga erishildi.
Shundan so‘ng, delegatsiyasi a’zolari Milliy gvardiya bo‘linmalarida xizmat qilib, o‘z burchini bajarish chog‘ida qahramonlarcha halok bo‘lgan safdoshlarimiz xotirasiga bag‘ishlangan yodgorlikka hurmat bajo keltirishdi.
Tashrif davomida mehmonlar Situatsion markazi, Milliy gvardiya Ma’naviyat va ma’rifat markazi, Axborot xizmati, Bolalar psixologiyasi markazi shuningdek, Milliy gvardiya maxsus bataloni hamda Jamoat xavfsizligi universiteti faoliyati bilan tanishishdi.
Ishchan va do‘stona muloqot ruhida bo‘lib o‘tgan tashrif davomida o‘zaro manfaatli ikki tomonlama amaliy hamkorlikni yanada rivojlantirishga oid qator masalalar belgilab olindi.
Tadbir davomida mehmonlar, poytaxtimizning faxri bo‘lgan Temuriylar tarixi davlat muzeyida bo‘lib, ajdodlarimizning boy tarixiy merosi bilan tanishgan bo‘lsalar, Islom sivilizatsiyasi markaziga tashriflari davomida Davlatimiz rahbari tomonidan ma’naviyat va ma’rifat sohasida amalga oshirilayotgan islohotlarning yangi bosqichidagi ulkan ishlardan katta taassurotga ega bo‘lishdi.
