Jazirama kunlarida tibbiy maslahat
O‘zgidromet prognoziga ko‘ra, dam olish kunlari O‘zbekistonda havo harorati 43-45 darajagacha ko‘tarilishi kutilmoqda.
Yozning jaziramasida nimalarga amal qilish kerak va nima taqiqlanadi?
Milliy gvardiya tibbiyot bo‘limi mutaxassislarining eslatib o‘tishicha, issiq kunlarda gipertonik inqiroz va yurak-qon tomir tizimi kasalliklarining kuchayish xavfi ortadi. Shuning uchun keksa odamlarga va nafas olish tizimi, yurak va qon bosimi bilan bog‘liq muammosi bor insonlarga alohida eʼtibor berilishi kerak.
Ko‘chada o‘zini yomon his qilgan odamni ko‘rsangiz, birinchi navbatda tez yordam chaqirish kerak. Shifokorlar kelishidan oldin, uni barcha mumkin bo‘lgan vositalar bilan sovutishga harakat qiling: uni soyaga yoki salqin xonaga olib borib, sovuq suv seping, ho‘l latta bilan o‘rang yoki peshona qismiga nam ro‘molcha qo‘ying. Tanani sovutish issiqlik qurbonlari uchun birinchi yordamdir!
Iloji bo‘lsa, soat 11:00 dan 17:00 gacha quyoshdan uzoqroq turishga harakat qiling. Agar ko‘chaga chiqmaslikning iloji bo‘lmasa, bosh kiyim kiyib, o‘zingiz bilan suv olib yuring.
Ko‘p suv iching ayniqsa mineral suvlar. Chunki ortiqcha terlash natijasida suv-tuz balansi buziladi, bu esa suvsizlanishga olib keladi.
Shifokorlar issiq havoda gazlangan suv shuningdek, shirin ichimliklar va spirtli ichimliklarni ichishni tavsiya etmaydi.
Muzli suv ichmaslik kerak, ayniqsa quyoshda uzoq vaqt bo‘lgan bo‘lsangiz. Bu oshqozon uchun zararli, bundan tashqari, qon tomirlarining keskin siqilishi paydo bo‘ladi va organlarning qon taʼminoti yomonlashadi.
Yog‘li va achchiq ovqatlarni isteʼmol qilmaslik kerak, sababi issiq kunlarda organizm go‘sht, meva, yogurt va yog‘siz go‘shtsiz sabzavotli sho‘rvalar va salatlarni osonroq qabul qiladi.
Tabiiy materiallardan tayyorlangan ochiq rangdagi yengil kiyim kiying. Sintetik matolar va qorong‘i, yorug‘likni yutuvchi material issiqlik to‘planishi taʼsirini oshiradi.
Hech qachon issiq havoda qariyalarni, bolalarni yoki hayvonlarni mashinada qoldirmang!
Umid qilamizki, bizning maslahatlarimiz yozning jaziramasidan osonroq o‘tishingizga yordam beradi. O‘zingizni va yaqinlaringizni ehtiyot qiling, salomat bo‘ling!
