Yangiliklar

Joriy yilning 18 yanvar kuni O‘zbekiston Respublikasi Milliy gvardiyasi Jizzax viloyati bo‘yicha boshqarmasida Jizzax viloyati Qo‘riqlash boshqarmasi hamda Yoshlar ittifoqi viloyat Kengashi bilan hamkorlikda uyushmagan yoshlar, oliy o‘quv yurtlari talabalari, umumtaʼlim maktabi o‘quvchilari va harbiylashtirilgan sinflar hamda oilaviy bolalar uyi farzandlari ishtirokida ularning qishki taʼtil kunlarini mazmunli tashkil etish, yoshlarni keng qamrovda sportga jalb qilish va shu orqali ularning hayot yo‘lini tanlashga ko‘mak berish, shuningdek, ularning qalbida tinchlikka bo‘lgan shukronalikni va vatanni sevish xissini uyg‘otish, vatanparvarlik ruhini bugungi kun qahramonlari orqali singdirish maqsadida ochiq eshiklar kuni o‘tkazildi. Tadbirning ochilish qismida so‘z olganlar bugungi kunda mamlakatimiz rahbari tomonidan olib borilayotgan islohotlar, yoshlar siyosati va uning ijrosi yuzasidan yoshlarga berilayotgan imkoniyatlar xususida so‘zlab, barcha ishtirokchilarga omad tiladilar. Shundan so‘ng, tadbir ishtirokchilari va yoshlar boshqarma tomonidan tayyorlangan xizmat va targ‘ibot avtotransport vositalari, maxsus vositalar, tibbiyot anjomlari, aloqa vositalari va tezkor harakatlanuvchi guruh vazifalari bilan tanishib ular haqida maʼlumotlarga ega bo‘ldilar.

Tadbir davomida bolajonlar qaynoq qahva, choy hamda tansiq shirinliklar bilan mehmon qilindi. Tadbirning ikkinchi qismida ishtirokchilar xizmat otlarini minib ko‘rdilar. Tog‘ va balandliklarni ishg‘ol qilishda foydalanadigan jihozlar va ularning vazifalari bilan tanishdilar. Kamondan otish, tosh ko‘tarish va arqon tortish sport turlari bo‘yicha musobaqalar tadbir ishtirokchilarining murosasiz bahslari bilan birga olqishiga sabab bo‘ldi. Yuzdan ortiq yigit va qizlarni bir joyga jamlagan mazkur ochiq eshiklar kuni yakunida g‘oliblarga tashkilotchilar tomonidan diplom va tashakkurnomalar tantanali topshirildi.