Жиззах вилояти ёшлари билан очиқ эшиклар куни
Жорий йилнинг 18 январь куни Ўзбекистон Республикаси Миллий гвардияси Жиззах вилояти бўйича бошқармасида Жиззах вилояти Қўриқлаш бошқармаси ҳамда Ёшлар иттифоқи вилоят Кенгаши билан ҳамкорликда уюшмаган ёшлар, олий ўқув юртлари талабалари, умумтаълим мактаби ўқувчилари ва ҳарбийлаштирилган синфлар ҳамда оилавий болалар уйи фарзандлари иштирокида уларнинг қишки таътил кунларини мазмунли ташкил этиш, ёшларни кенг қамровда спортга жалб қилиш ва шу орқали уларнинг ҳаёт йўлини танлашга кўмак бериш, шунингдек, уларнинг қалбида тинчликка бўлган шукроналикни ва ватанни севиш хиссини уйғотиш, ватанпарварлик руҳини бугунги кун қаҳрамонлари орқали сингдириш мақсадида очиқ эшиклар куни ўтказилди. Тадбирнинг очилиш қисмида сўз олганлар бугунги кунда мамлакатимиз раҳбари томонидан олиб борилаётган ислоҳотлар, ёшлар сиёсати ва унинг ижроси юзасидан ёшларга берилаётган имкониятлар хусусида сўзлаб, барча иштирокчиларга омад тиладилар. Шундан сўнг, тадбир иштирокчилари ва ёшлар бошқарма томонидан тайёрланган хизмат ва тарғибот автотранспорт воситалари, махсус воситалар, тиббиёт анжомлари, алоқа воситалари ва тезкор ҳаракатланувчи гуруҳ вазифалари билан танишиб улар ҳақида маълумотларга эга бўлдилар.
Тадбир давомида болажонлар қайноқ қаҳва, чой ҳамда тансиқ ширинликлар билан меҳмон қилинди. Тадбирнинг иккинчи қисмида иштирокчилар хизмат отларини миниб кўрдилар. Тоғ ва баландликларни ишғол қилишда фойдаланадиган жиҳозлар ва уларнинг вазифалари билан танишдилар. Камондан отиш, тош кўтариш ва арқон тортиш спорт турлари бўйича мусобақалар тадбир иштирокчиларининг муросасиз баҳслари билан бирга олқишига сабаб бўлди. Юздан ортиқ йигит ва қизларни бир жойга жамлаган мазкур очиқ эшиклар куни якунида ғолибларга ташкилотчилар томонидан диплом ва ташаккурномалар тантанали топширилди.
