Poytaxtimizdagi maktablarda o‘tkazilgan reyd tadbirlari davomida ayrim o‘quvchi yoshlardan o‘tkir tig‘li buyumlar olib qo‘yildi
Chilonzor tumanidagi 195-maktabning sakkizinchi sinf va 178-maktabning 11-sinf o‘quvchilari yonida “babochka” nomli yig‘ma pichoqlar olib yurganligi aniqlandi. Sergeli tumanidagi 267-maktabning 9-sinf o‘quvchisidan esa “ruchka” ko‘rinishidagi pichoq olib qo‘yildi.
Mazkur maktablarga yangi tayinlangan Milliy gvardiya inspektor- psixologlari o‘quvchilarning ota-onalari bilan maktab maʼmuriyati ishtirokida profilaktik suhbatlar olib borishdi. Ota-onalarga bolalarning pichoq olib yurishi ularning muammolarga duch kelayotganligidan darak berishini va bu ularga hayoliy himoya berishini eslatdi. Shuning uchun ota-onalar farzandlarining xatti-harakatiga ko‘proq eʼtibor berishi, ular bilan maktab va sinfdagi vaziyat haqida suhbatlashishi, taʼlim muassasasidagi, mahalladagi tengdoshlari bilan munosabatlari to‘g‘risida bilishi kerakligi uqtirib o‘tildi.
Shu o‘rinda “Babochka” nomli yig‘ma pichoqning kelib chiqishining bir necha xil tarixi borligini bilarmidingiz? Birinchisi – mazkur pichoqni arqonlarni, bo‘ronda yelkanlarni bir qo‘l bilan qulay kesish uchun filippinlik dengizchilar o‘ylab topishgan. Ikkinchisi – “babochka” pichog‘ining kriminal o‘tmishi mavjud bo‘lib, uni ko‘cha bezori to‘dalar hamda jinoiy jamiyat aʼzolari o‘ylab topishgan.
Agar farzandingiz dengizchi yoki ko‘cha qaroqchisi bo‘lmasa pichoq unga nima uchun kerak?
“Ruchka” pichog‘i haqida ham o‘smirlar va ota-onalarga huddi shu savolni bermoqchiman: nega xavfli bo‘lgan buyumni o‘quvchi o‘zi bilan olib yurishi kerak? To‘g‘ri, bunday pichoq ish yuritish buyumlariga kiradi va deyarli har qanday savdo nuqtasida, shu jumladan internet saytlarida sotiladi. Lekin nega bu maktab sumkasida? Axir, o‘quvchi sinfda qog‘ozni pichoq bilan kesmaydi-ku.
Aziz ota-onalar, bolalaringizga diqqatli bo‘ling, farzandingiz mashg‘ulotlari bilan qiziqing, u bilan ko‘proq gaplashing, ishonchli munosabatlar o‘rnating. Axir, bu sizning zurriyodingiz, siz u haqida orzu qilgansiz va albatta uni yaxshi inson qilib tarbiyalashni xohlaysiz. Unga baxtli kelajak tilaysiz.
