Milliy gvardiya qo‘mondoni Chirchiq shahridagi 14-sonli Mehribonlik uyida tashkil etilgan bayramona tadbirda ishtirok etdi
Yurtimizda bahor shukuhi kezib yurgan ayni pallada o‘tkazilayotgan bahoriy tadbirlar barchaga ko‘tarinki kayfiyat bag‘ishlamoqda.
Xususan, Milliy gvardiya qo‘mondonligi tashabbusi bilan Chirchiq shahrida joylashgan 14-sonli Mehribonlik uyida tashkil etilgan tadbir ham katta shodiyonaga aylanib ketdi.
Tadbirda Milliy gvardiya qo‘mondoni general-mayor R.Djurayev, Chirchiq shahar hokimi D.Xidoyatov, shahar prokurori H.Bo‘riyev, hamkor tashkilotlarning mutasaddi rahbarlari hamda tizim harbiy xizmatchilari ham ishtirok etib, mehribonlik uyi tarbiyalanuvchilari xursandchiligiga sherik bo‘lishdi.
Yuqori saviyada tashkil etilgan bayramona tadbirda tarbiyalanuvchi o‘g‘il-qizlarning bo‘sh vaqtlarini mazmunli o‘tkazish va mustaqil hayotga tayyorlash maqsadida, “Eng yaxshi osh” hamda “Eng yaxshi bahor salatlari” tanlovlari o‘tkazildi.
Tanlovda Jamoat xavfsizligi universitetining kursant qizlari, shuningdek, muddatli harbiy xizmatchilar ishtirokchilarga yaqindan yordam berishdi.
Yakuniy natijalarga ko‘ra, bir-biridan shirin taomlar tayyorlagan jamoalar turli nominatsiyalar bo‘yicha munosib rag‘batlantirildi.
