Milliy gvardiya tizimida "Eng yaxshi kitobxon" tanlovi g‘oliblari aniqlandi
“Eng yaxshi kitobxon” tanlovining yakuniy bosqichi o‘tkazildi Qadimiy va betakror diyorimizdan yetishib chiqqan buyuk sarkardalar, allomalar, adib va mutafakkirlarimizning boy maʼnaviy merosi, harbiy sanʼati, madaniyati, dunyoviy va diniy ilm-fan taraqqiyotiga qo‘shgan ulkan hissasini o‘rganish, ularning noyob asarlari, ibratli hayoti va ijtimoiy faoliyatini kelgusi avlodga bezavol yetkazish, keng targ‘ib etish hamda harbiy xizmatchilar va xodimlar o‘rtasida kitobxonlik madaniyatini yana-da ommalashtirish maqsadida, Milliy gvardiya tizimida “Eng yaxshi kitobxon” ko‘rik tanlovi tashkil etilgan edi.
Kuni kecha mazkur tanlovning yakuniy bosqichi bo‘lib o‘tdi. Unda hududiy bosqichlardan yuqori natijaga erishib, respublika bosqichida ishtirok etish huquqini qo‘lga kiritgan 19 nafar ishtirokchilar qatnashdi.
Ishtirokchilar “Biz buyuk sarkardalar avlodimiz”, “Jahon tamadduni va o‘zbek xalqi madaniyati rivojiga ulkan hissa qo‘shgan allomalarimiz” hamda “Mustaqil vazifa” shartlari bo‘yicha sinovdan o‘tkazildi.
Hakamlar hayʼati tomonidan ishtirokchilarni baholashda adolat mezoni asosida, ularning tayyorgarligi, bilimi, asarni ifodali va taʼsirli o‘qishi hamda kitobxonlik mahoratiga eʼtibor qaratildi.
G‘oliblar Adbulla Qodiriy memorial muzeyida tantanali ravishda Milliy gvardiyaning I, II va III darajali diplomlari hamda esdalik va qimmatbaho sovg‘alar bilan taqdirlandi.
Yakuniy natijalarga ko‘ra ko‘rik tanlovda Milliy gvardiya Namangan viloyati bo‘yicha boshqarmasi kichik serjanti Botirov Muhriddin 3 o‘rinni egallagan bo‘lsa, 2-o‘rin Jamoat xavfsizligi universiteti kursanti Toshmurodov Axrorga nasib etdi. Faxrli 1-o‘rinni esa Milliy gvardiya Andijon viloyati bo‘yicha boshqarmasi kichik serjanti Ruzimatov Shoxrux qo‘lga kiritdi.
Shu bilan birga, ko‘rik tanlovning “Eng yaxshi kitobxon”, “Eng yosh kitobxon”, “Eng zukko kitobxon” hamda “Eng faol kitobxon” nominatsiyalari bo‘yicha ham sovrindorlar munosib taqdirlandi.
Xulosa o‘rnida taʼkidlash joizki, mazkur tanlovlar harbiy xizmatchi va xodimlarning maʼnaviyatini yuksaltirish, ular o‘rtasida kitobxonlikni yana-da ommalashtirish, milliy adabiyotimizning durdona asarlarini yosh avlod o‘rtasida keng targ‘ib etishda munosib o‘rin tutadi.
