Yangi O‘zbekiston taraqqiyoti, yurt tinchligi va xalq osoyishtaligini ta’minlashdek muqaddas burchni zimmasiga olayotgan yana bir guruh yosh ofitserlar sharafli xizmat yo‘liga kuzatildi.

Milliy gvardiya Jamoat xavfsizligi universitetida bo‘lib o‘tgan tantanali bitiruv marosimi nafaqat yosh ofitserlar hayotidagi muhim voqea, balki mamlakatimiz harbiy ta’lim tizimida amalga oshirilayotgan keng ko‘lamli islohotlarning yana bir amaliy ifodasi bo‘ldi.
Davlatimiz rahbari tomonidan belgilangan ustuvor vazifalar asosida mamlakatimizda harbiy ta’lim tizimi tubdan takomillashtirilib, Milliy gvardiya Jamoat xavfsizligi universitetida xalqaro standartlarga javob beradigan, innovatsion ta’lim texnologiyalari joriy etilgan, ofitser kadrlarni tayyorlashning mutlaqo yangi tizimi shakllantirildi. Zamonaviy o‘quv infratuzilmasi, raqamli texnologiyalar, interaktiv mashg‘ulotlar va amaliy tayyorgarlik uchun yaratilgan keng imkoniyatlar kursantlarning intellektual salohiyati, jangovar mahorati, rahbarlik qobiliyati hamda Vatanga sadoqat tuyg‘usini yanada mustahkamlashga xizmat qilmoqda.
Bugun ushbu dargohda ta’lim olgan yuzlab ofitserlar Milliy gvardiya, Qurolli Kuchlar, Ichki ishlar vazirligi hamda boshqa kuch tuzilmalari safida Vatan manfaatlari, xalq tinchligi va jamoat xavfsizligini ta’minlash yo‘lida munosib xizmat qilib, o‘z bilim va salohiyatini amalda namoyon etmoqda.
Mazkur tantana ham ana shu ezgu maqsadlar va islohotlarning mantiqiy davomi sifatida tashkil etildi. Universitet saf maydonida jam bo‘lgan yigit-qizlar buyuk davlatchilik an’analarining munosib vorislari, sohibqiron Amir Temur maktabining jasorat va matonat ruhini o‘zida mujassam etgan, Yangi O‘zbekistonning tinchligi, xalqimiz osoyishtaligi va mamlakatimiz xavfsizligini ta’minlashga bel bog‘lagan mard, jasur va fidoyi ofitserlar ekanini yana bir bor amalda namoyon etdilar.
Shu bois marosim Milliy gvardiyaning yuksak harbiy an’analari, milliy davlatchilik g‘oyalari, boy ma’naviy meros, Vatanga sadoqat va milliy qadriyatlarni o‘zida mujassam etgan holda, yuksak saviya va ko‘tarinki ruhda tashkil etildi.
Tadbirning dastlabki daqiqalaridanoq maydonni yuksak faxr va haybat muhiti qamrab oldi. “Temur tuzuklari”da mujassam bo‘lgan intizom, jasorat va sadoqat tamoyillariga hamohang tarzda 12 nafar bayroqdor O‘zbekiston Respublikasi Davlat bayrog‘i, buyuk Temuriylar saltanati bayrog‘i hamda Milliy gvardiyaning sharaf, matonat va fidoyilik ramzi bo‘lgan jangovar bayrog‘ini maydon uzra baland g‘urur bilan olib o‘tishdi. Bu ta’sirli manzara ajdodlar merosi va Yangi O‘zbekiston harbiy qudratining uzviy davomiyligini ifoda etgan ramziy sahnaga aylandi.
Milliy gvardiya hamda mamlakatimiz kuch tuzilmalari saflariga qadam qo‘yayotgan bitiruvchilarga dastlabki ofitserlik harbiy unvonini tantanali ravishda topshirish marosimida Qurolli Kuchlar tizimiga kiruvchi vazirlik va idoralar, huquqni muhofaza qiluvchi organlar hamda davlat tashkilotlari rahbarlarining ishtirok etishi tadbirning yana bir muhim jihati bo‘ldi. Bu esa mamlakatimizda Vatan tinchligi, xalq osoyishtaligi va jamoat xavfsizligini ta’minlash yo‘lida barcha kuch va tuzilmalarning yagona maqsad, mushtarak g‘oya, mustahkam hamjihatlik va o‘zaro hamkorlik asosida faoliyat yuritayotganining yorqin ifodasi sifatida namoyon bo‘ldi.

Mazkur bitiruv tadbirida Milliy gvardiya qo’mondoni general-polkovnik B.Tashmatov, O‘zbekiston Respublikasi Oliy Majlisi Senatining Mudofaa va xavfsizlik masalalari qo‘mitasi raisi K. Burxanov, Oliy Majlis Qonunchilik palatasining Korrupsiyaga qarshi kurashish va sud-huquq masalalari qo‘mitasi raisi J. Shirinov, O‘zbekiston Respublikasi Prezidenti Administratsiyasi sho‘ba mudiri M. Murodova, Respublika Ma’naviyat va ma’rifat markazi rahbari O. Xasanov, Favqulodda vaziyatlar vaziri A. Ikramov, O‘zbekiston Respublikasi Harbiy prokurori, Bosh prokuror o‘rinbosari Q. Isroilov, O‘zbekiston Yozuvchilar uyushmasi raisi o‘rinbosari M. Xodjimatov, Harbiy sud raisi U. Djumayev, Mudofaa vaziri o‘rinbosari A. Norboyev, Ichki ishlar vaziri o‘rinbosari D. Sattorov, Toshkent harbiy sudi raisi J. Raxmonov, Favqulodda vaziyatlar vazirligi akademiyasi boshlig‘ining birinchi o‘rinbosari F. Nazarov, Harbiy xavfsizlik va mudofaa universiteti boshlig‘i o‘rinbosari A. Qodirov, Ichki ishlar vazirligi Akademiyasi boshlig‘i o‘rinbosari S. Tadjimetov, Prezident huzuridagi xavfsizlik kengashi sektor mudiri M.Ergashev , Bojxona instituti boshlig‘i o‘rinbosari U. Botirov, shuningdek, soha mutasaddilari, faxriylar hamda ommaviy axborot vositalari vakillari ishtirok etdi.
Marosimning ochilish qismida Milliy gvardiya qo‘mondoni bitiruvchilarni dastlabki ofitserlik harbiy unvoni bilan samimiy muborakbod etdi. Shuningdek, tadbirda ishtirok etgan faxriy mehmonlar ham yosh ofitserlarga kelgusi sharafli xizmatlarida muvaffaqiyat, xalq ishonchi va Vatan ravnaqi yo‘lida yuksak zafarlar tiladilar. Tantananing eng hayajonli va unutilmas lahzalaridan biri diplom hamda ko‘krak nishonlarini topshirish marosimi bo‘ldi. Bu nafaqat ta’lim jarayonining yakunlanishi, balki har bir yosh ofitser uchun Vatan taqdiri, xalq ishonchi va qasamyodi oldidagi yuksak mas’uliyatni zimmaga olishning ramziy daqiqalari sifatida alohida ahamiyat kasb etdi.

Joriy yilda universitetning 10 ta harbiy ta’lim yo‘nalishi bo‘yicha 316 nafar kursant muvaffaqiyatli bitirdi. Ulardan 15 nafari imtiyozli diplomga sazovor bo‘ldi. Bu esa universitetda yaratilgan zamonaviy ta’lim muhiti, yuqori malakali professor-o‘qituvchilar mehnati va kursantlarning izchil intilishi samarasi sifatida e’tirof etildi.
Joriy yilgi bitiruvchilar Milliy gvardiya, Ichki ishlar vazirligi hamda mamlakatimiz Qurolli Kuchlari tizimidagi boshqa vazirlik va idoralarda xizmat faoliyatini davom ettirib, yurtimiz tinchligi, jamoat xavfsizligi va xalqimiz osoyishtaligini ta’minlash yo‘lida munosib xizmat qilishadi. Ular bugun olgan bilim va ko‘nikmalarini amaliy faoliyatda namoyon etib, Yangi O‘zbekiston taraqqiyotiga munosib hissa qo‘shishadi.
Bitiruvchilar safida To‘maris izdoshlari bo‘lgan o‘nlab qizlarning ham munosib o‘rin egallagani mamlakatimizda xotin-qizlarning davlat va jamiyat hayotidagi faol ishtirokini kengaytirish, ularning harbiy sohadagi salohiyatini yuksaltirish hamda gender tengligini ta’minlash borasida amalga oshirilayotgan islohotlarning amaliy natijasidir. Ular ham yuksak bilim, mustahkam iroda va Vatanga sadoqat bilan el-yurt xizmatiga shay ekanliklarini namoyon etdilar.
Marosim davomida O‘zbekiston Respublikasi Davlat madhiyasi yangrab, harbiy orkestr milliy ohanglar bilan boyitilgan musiqiy dasturini taqdim etdi. Kursantlar hamda o‘zbek jang san’ati ustalarining mahorati, harbiy ko‘rgazmali chiqishlari tantanaga yanada fayz bag‘ishladi. Tadbirning eng mahobatli va tarixiy ruh bilan yo‘g‘rilgan sahnalaridan biri buyuk davlat arbobi va sohibqiron Amir Temur siymosining sahnalashtirilishi bo‘ldi. Sohibqironning sadoqatli sipohlari bilan otliq va piyoda saflarda maydonga kirib kelishi, uning Vatanga muhabbat, jasorat, adolat va davlatchilik g‘oyalarini tarannum etgan tarixiy murojaati barcha ishtirokchilar qalbida milliy g‘urur, iftixor va ajdodlar merosiga bo‘lgan yuksak ehtirom tuyg‘ularini yanada mustahkamladi. Bu sahna asrlar davomida shakllangan milliy davlatchilik an’analari bilan Yangi O‘zbekistonning zamonaviy harbiy salohiyati o‘rtasidagi ma’naviy vorislikni yorqin ifoda etdi.
Tantana davomida Vatanni, milliy g‘urur, sadoqat va fidoyilikni tarannum etuvchi kuy-qo‘shiqlar maydon uzra jarang sochdi. Har bir safda 12 nafardan joy olgan kursantlar hamda milliy liboslardagi san’atkorlarning uyg‘un, mahobatli va yuksak mahorat bilan ijro etgan chiqishlari harbiy intizom, milliy san’at va boy ma’naviy merosning betakror uyg‘unligini namoyon etdi. Har bir kuy, har bir qadam va har bir harakat mehmonlar qalbida Vatanga muhabbat, xalqqa sadoqat va milliy iftixor tuyg‘ularini yanada yuksaltirib, marosimga o‘ziga xos ko‘tarinki ruh bag‘ishladi.
Marosim yakunida bitiruvchilarning ota-onalari va yaqinlari maydonga chiqib, o‘z farzandlarini bag‘riga bosgan holda ularni samimiy muborakbod etdilar. Bu lahzalar ko‘zlardagi quvonch yoshlari, yuraklardagi faxr va cheksiz iftixor tuyg‘ulari bilan yanada ta’sirchan tus oldi. Zero, bugun ofitserlik safiga qo‘shilgan yoshlar nafaqat ota-onalarining orzu-umidlarini, balki xalqimiz ishonchi va Vatan taqdirini ham o‘z yelkalariga olmoqda. Ular el-yurt tinchligi, mamlakatimiz xavfsizligi va Yangi O‘zbekiston taraqqiyoti yo‘lida sadoqat bilan xizmat qilishga qasamyod qilgan avlod sifatida yurtimiz kelajagining ishonchli tayanchi bo‘lib maydonga chiqmoqda.