YОSHLAR SIYOSATIGA OID VAZIFALAR AMALDA
Bugungi kunda mamlakatimiz yoshlarini amalga oshirilayotgan keng ko‘lamli islohotlarning faol va jonkuyar ishtirokchisiga aylantirishga qaratilgan kompleks chora-tadbirlar o‘z samarasini bermoqda.
Xususan, Voyaga yetmaganlar o‘rtasida nazoratsizlik va huquqbuzarliklarning oldini olish, alohida sharoitlarda tarbiyalash va taʼlim berishga muhtoj bo‘lgan yoshlar bilan ishlash tizimi tubdan takomillashtirildi.
Baxt shahrida joylashgan Respublika o‘g‘il bolalar o‘quv-tarbiya muassasasi tarbiyalanuvchilarining bir guruxiga Sirdaryo tumanida joylashgan yoshlarni kasbga yo‘naltirish o‘quv markazi kurslarini tamomlaganliklari munosabati bilan sertifikatlar topshirildi.
2019-2021 yillarda O‘zbekiston Respublikasini rivojlantirishning beshta ustuvor yo‘nalishi bo‘yicha Harakatlar strategiyasiga muvofiq davlatimiz rahbarining “Ixtisoslashtirilgan o‘quv-tarbiya muassasalari faoliyatini tubdan takomillashtirish to‘g‘risida”gi Qarori qabul qilindi.
Mazkur Qarorga asosan Sirdaryo viloyati Baxt shahrida joylashgan Respublika o‘g‘il bolalar o‘quv-tarbiya muassasasi O‘zbekiston Respublikasi Milliy gvardiyasiga va Toshkent viloyati, Chinoz tumanida joylashgan Respublika qiz bolalar o‘quv-tarbiya muassasasi Ichki ishlar vazirligiga biriktirildi.
Ushbu o‘quv-tarbiya muassasalariga 2019 yildan boshlab ota-ona yoki ota-ona o‘rnini bosuvchi shaxslar nazoratisiz va qarovsiz qolgan, shuningdek, davlat va jamoatchilik yordamiga muhtoj bo‘lgan o‘smir-yoshlar, voyaga yetmaganlar ishlari bo‘yicha hududiy idoralararo komissiya tavsiyasiga asosan tegishli vazirlik va idoralar qarorlari (yo‘llanmalari) asosida qabul qilina boshlandi.
Milliy gvardiyaga biriktirilgan Baxt shahridagi Respublika o‘g‘il bolalar o‘quv-tarbiya muassasasidagi bolalarda mehnatsevarlik va komillikka intilish, jismonan yetuk, milliy anʼana va qadriyatlarimizga sadoqatli yoshlarni voyaga yetkazishga qaratilgan kompleks chora-tadbirlarni amalga oshirish maqsadida yo‘l xaritasi ishlab chiqildi.
Muassasa tashqi ko‘rinishi tubdan o‘zgardi, hududda landshaft dizayni ishlari olib borildi. O‘quv binosi, kutubxona va yotoqxona to‘liq taʼmirdan chiqazilib, zamon talablariga mos texnik vositalari, o‘quv moddiy bazalari, va mebel jixozlari bilan taʼminlandi. Sunʼiy qoplamali futbol maydoni va sport zal faoliyati yo‘lga qo‘yilib zaruriy sport anjomlari bilan boyitilib tarbiyalanuvchilar uchun barcha shart-sharoitlar yaratib berildi.
Muassasa oshxonasi zamonaviy tus oldi, tarbiyalanuvchilarni ovqatlanishi Autsorsing tizimiga o‘tkazilib, kuniga 4 (to‘rt) marotaba kaloriyali ovqatlantirish tartibi yo‘lga qo‘yildi.
O‘quv-tarbiya muassasasidagi tarbiyalanuvchilarni qatʼiy tarzda har olti oyda chuqurlashtirilgan tibbiy ko‘rikdan o‘tkazib borish va bemor tarbiyalanuvchilarni tibbiyot muassasalarida bepul davolash ishlari yo‘lga qo‘yildi.
Tarbiyalanuvchilarning bo‘sh vaqtlarini mazmunli tashkil etish maqsadida besh tashabbus doirasida musiqa, kitobxonlik, rassomchilik, chilangarlik, haykaltaroshlik, duradgorlik, quyonchilik, parrandachilik, oshpazlik, harbiy tayyorgarlik va sport kabi to‘garaklar tashkil etildi.
Muassasa tarbiyalanuvchilarini mamlakatimizda amalga oshirilayotgan keng ko‘lamli islohotlarning faol va jonkuyar ishtirokchisiga aylantirish maqsadida ular bilan birgalikda o‘qituvchilar, tarbiyachilar, tartibot nozirlari va muassasaning barcha xodimlari bilan davlatimiz rahbarining qarorlari (4342-sonli qarori) talablarini o‘rganish va hayotga tatbiq etish bo‘yicha tushuntirish va targ‘ibot tadbirlari olib borilmoqda.
Mazkur Qarorning o‘z vaqtida qabul qilinganligi samarasida 2019 yilning ikkini yarim yilligida 33 nafar tarbiyalanuvchi qabul qilingan bo‘lsa, shu muddat davomida 80 nafar tarbiyalanuvchi yaxshi xulq bilan ota-onasi bag‘riga qaytarildi, 2020 yilda esa bu ko‘rsatkich 106 nafarga yetdi. Oilasiga qaytarilgan tarbiyalanuvchilarni oila muhitiga ko‘nikishi, maktab va mehribonlik uylariga joylashtirilishi bo‘yicha mahalliy hokimiyat vakillari bilan doimiy aloqalar o‘rnatilishi Milliy gvardiya qo‘mondonligi nazoratiga olindi. Shu bois, oilasi bag‘riga qaytarilgan tarbiyalanuvchilardan shikoyat va arizalar yoki yomon xulq bilan muassasaga qaytarilib olib kelingan o‘quvchilar hozircha kuzatilmadi.
Milliy gvardiya qo‘mondonligi tomonidan muassasa tarbilanuvchilarining nafaqat o‘quv-tarbiya jarayonida balki bitruvchilarning har biri respublika bo‘ylab nazoratga olinishi taʼminlanib Milliy gvardiyaning hududiy bo‘linmalaridan masʼullar biriktirildi va ular tomonidan muassasa raxbarlari bilan to‘g‘ridan-to‘g‘ri aloqa o‘rnatilib monitoring qilib borilishi taʼminlandi.
Bitiruvchilarning oliy taʼlim muassasalariga o‘qishga kirishi yoki ish bilan taʼminlanib, ularning xolidan xabar olib turilishi, qolaversa hayotda o‘z o‘rinlarini topib ketishiga ko‘mak berilishi joylardagi Milliy gvardiya mutasaddi raxbarlarining nazoratiga olinib masʼullardan qattiy talab qilinishi belgilab qo‘yildi.
2020 yilda ushbu muassasaning 2 nafar tarbiyalanuvchisi Milliy gvardiya “Temurbeklar maktabiga” bir nafari Andijon davlat universitetiga yana bir nafari Toshkent axborot texnalogiyalari universitetiga o‘qishga qabul qilindi.(O‘zbekiston 24 lavhasi)
Hozirda bu kabi ishlar davom qildirilib tarbiyalanuvchilarni o‘rnatilgan tartibda ssilka ( Vazirlar mahkamasining 880-sonli qarori talablariga asosan) 9 va 11-sinfdan keyin o‘qishga kirishga ko‘maklashish va joylashtirish masalalari o‘rganib chiqilmoqda. Bugungi kunda Milliy gvardiya va Mudofaa vazirligi “Temurbeklar maktablariga” IIV ga qarashli harbiy akademik litseyiga, o‘qishga kirish istagini bildirgan tarbiyalanuvchilar bilan qo‘shimcha mashg‘ulotlar o‘tkazilishi yo‘lga qo‘yilgan.
Shuningdek, muassasa tarbiyalanuvchilari bilan mutaxassislar tomonidan olib borilayotgan o‘rganishlar davomida turli yo‘nalishlarda ularning qiziqishlari va iqtidori aniqlanib to‘g‘ri yo‘naltirishga asosiy eʼtibor qaratilmoqda. Xususan, joriy yilning aprel oyida Sirdaryo tumanida joylashgan yoshlarni kasbga yo‘naltirish o‘quv markazida to‘liq kurslarni tamomlagan 18 nafar tarbiyalanuvchilarga sertifikatlar topshirildi.
Hukumatimiz tomonidan yosh avlod xususan, kam taʼminlangan oilalardagi yoki ota-ona qaramog‘isiz qolgan o‘smirlar muammolariga ko‘rsatayotgan eʼtibor, ularning o‘qishi uchun barcha sharoit yaratishga, mehnat faoliyatidagi istiqbollariga, shaxsiy rivojlanishiga yordam berib, ularning kelgusida mamlakatimiz farovonligiga munosib hissa qo‘shishiga imkon yaratib bermoqda.