ЯНГИ ЎЗБЕКИСТОНДА - ЯНГИЧА ТИЗИМ
Бугун 10 август куни Миллий гвардия қўмондони генерал-майор Р.Джураев раислигида “Етим болалар ва ота-она қарамоғидан маҳрум бўлган болаларни давлат томонидан қўллаб-қувватлашнинг янги тизимини жорий этиш чора-тадбирлари тўғрисида” ги Президент қарорининг мазмун моҳияти, шунингдек ушбу йўналишда тубдан янгиланган тизимни жорий этиш бўйича ишлаб чиқилган йўл харитасида белгиланган вазифаларни шахсий таркибга етказишга бағишланган видеоселектор йиғилиши бўлиб ўтди.
Мазкур йиғилишда Маҳалла ва оилани қўллаб-қувватлаш, Халқ таълими, Соғлиқни сақлаш, Мудофаа ва Ички ишлар вазирликлари ҳамда Меҳрибонлик уйлари мутасадди раҳбарлари, вилоят ва шаҳар ҳокимликлари, васийлик ва ҳомийлик органлари масъул ходимлари, Оилавий болалар уйи фаолиятини йўлга қўйган фуқаролар, ушбу йўналишга масъул бўлган Миллий гвардия таркибий ва ҳудудий бўлинмаларининг ҳарбий хизматчи ҳамда ходимлари, шунингдек журналистлар иштирок этишди.
Йиғилиш давомида Миллий гвардия қўмондони юртбошимиз раислигида
28 июль куни ногиронлиги бўлган, ота-она қарамоғидан маҳрум ва етим болаларни давлат томонидан қўллаб-қувватлашни кенгайтириш бўйича ўтказилган видеоселекторда аниқ вазифалар ва мақсадли йўналишлар белгилаб берилгани тўғрисида эслатиб, ушбу йўналишда тарихий аҳамиятга эга бўлган янги тизимнинг мазмун-моҳиятини бир қатор мисоллар билан ёритиб берди.
Очиқ мулоқот тарзида давом этган йиғилиш мобайнида ҳамкор вазирликлар мутасадди раҳбарлари сўз олиб, Меҳрибонлик уйлари тўғрисида Миллий гвардия қўмондони томонидан таъкидлаб ўтилган муаммоли масалалар ва уларнинг ечими тўғрисидаги таклифларини қўллаб-қувватлаган ҳолда келгусида ҳамкорликдаги ишларни жадаллаштиришга ва янги босқичга олиб чиқишга сўз бердилар.
Самимий руҳда давом этаётган ва ёшлар тақдири билан боғлиқ муҳим масалаларнинг ечими ўртага ташланганидан тўлқинланган Меҳрибонлик уйлари раҳбарлари ҳам сўзга чиқиб, Меҳрибонлик уйларининг фаолият юритиши Янги Ўзбекистонимизга ярашмаслигини, шунингдек олийжаноб халқимиз томонидан Оилавий болалар уйлари ташкил қилиниши оқибатида мамлакатимизда “етим” деган тушунчага барҳам берилишига ишонч билдирдилар.
Хулоса сифатида шуни таъкидлашимиз жоизки, Миллий гвардия ва жорий қилинган янги тизимга билдирилган ишонч мазкур йўналишга масъул бўлган барча ҳарбий хизматчи ва ходимларимизга катта масъулият юклаш билан бирга ушбу муқаддас бурчни адо этишда фахр ва ифтихор бағишлайди.
