“30 июн — Ёшлар куни” муносабати билан Миллий гвардия Маънавият ва маърифат марказида байрам тадбири бўлиб ўтди.
Албатта, юртимизда ёшларга қаратилаётган эътибор Мамлакатимиз Президенти Қуролли Кучлар Олий Бош Қўмондони раҳбарлигида олиб борилаётган ёшлар сиёсати натижасида янги босқичга кўтарилди. Бугунги кунда ёшларнинг таълим олиши, замонавий касбларни эгаллаши, тадбиркорлик билан шуғулланиши, ижтимоий ва сиёсий жараёнларда фаол иштирок этиши учун барча шарт-шароитлар яратиб берилган.
Миллий гвардия тизимида ҳам ёшлар масаласига алоҳида эътибор қаратилмоқда. Миллий гвардиянинг “Ёш гвардиячилар”, “Ёшлар билан очиқ мулоқот”, “Мен – ватан ҳимоячисиман” каби ташаббуслар орқали ёшлар орасида юртимизга бўлган муҳаббат, Ватанга садоқат, фидойилик ва жавобгарлик туйғуларини мустаҳкамлашга алоҳида эътибор қаратилмоқда.
Миллий гвардия Маънавият ва маърифат марказида Ёшлар ойлиги якунларига бағишланган тантанали тадбирда иштирок этган Миллий гвардия қўмондонлиги, Давлат хавфсизлик хизмати, Ижтимоий ҳимоя Миллий агентлиги, Маънавият ва маърифат маркази, Ёшлар ишлари агентлиги, Ички ишлар вазирлиги вакиллари томонидан ҳам ёшлар ойлиги ва юртимизда давом этаётган “Долзарб 90 кун” тадбирларининг ёшлар ҳаётида тутган ўрни тўғрисида яна бир бор тўхталиб ўтилди.
Тадбир давомида “30 июнь — Ёшлар куни” байрами муносабати билан Миллий гвардия қўмондонининг рағбатлантириш тўғрисидаги буйруғига кўра ҳамкор вазирлик ва идоралар, ҳарбий хизматчилар ва бир қатор ёшлар кўкрак нишонлари, фахрий ёрлиқ ва эсдалик совғалари билан мукофотланди.
Тадбир сўнгида Миллий гвардия Ашула ва рақс ансамбли хонандаларининг концерт дастури ёшлар учун армуғон этилди.
