“9 май -Хотира ва қадрлаш куни” муносабати билан хизмат бурчини бажариш чоғида қаҳрамонларча ҳалок бўлган сафдошларимиз сержант Суяров Хусниддин Зокирович ҳамда сержант Суюнов Хазрат Кароматовичларнинг ёрқин хотирасига ҳурмат бажо келтириш мақсадида жойларда тадбирлар ташкил этилди. Унда Миллий гвардия Фахрийлар кенгаши, Сирдарё ва Навоий вилоятлари бўйича бошқармалари ҳарбий хизматчилари, ҳарбий прокуратура, Ўзбекистон Ёшлар иттифоқи Кенгаши масъуллари, замонамиз қаҳрамонлари таҳсил олган мактаб ўқувчилари ҳамда кенг жамоатчилик иштирок этишди.
Шу куни Миллий гвардия Сирдарё вилояти бўйича бошқармасида ўрнатилган қаҳрамонларимизнинг монументи қаршисида уларнинг хотираси ёд этилди.
“Қаҳрамонлар номи барҳаёт” шиори остида марҳум сержант Суяров Хусниддин Зокирович ва сержант Суюнов Хазрат Кароматовичларнинг ёрқин хотирасига эҳтиром кўрсатилиб, Сардоба туманида ўрнатилган монументи пойига гулчамбар қўйилди.
Шунингдек, ўз ҳаётини хавф хатарга қўйиб мардларча ҳалок бўлган сержант Хусниддин Суяров таълим олган Боёвут туманида жойлашган 4-сонли умумтаълим мактабида ўрнатилган бюсти ёнида ҳам тадбир ташкил этилиб, унинг жасорати ёд этилиб, қаҳрамонлиги ўқувчиларга ҳикоя қилиб берилди. Шундан сўнг қабри зиёрат этилиб, у ерда ободонлаштириш ва кўкаламзорлаштириш ишлари олиб борилди.
Хизмат бурчини бажариш вақтида мардларча ҳалок бўлган сержант Хазрат Суюнов туғилиб ўсган Нурота туманидаги ўзи таҳсил олган 10-сонли мактабида ҳам 9-май - Хотира ва қадрлаш куни муносабати билан “Қаҳрамонлар номи барҳаёт” шиори остида тадбир ташкил этилди. Унда жам бўлганлар фуқаролар хавфсизлиги ва ҳаётини сақлаб қолишдек шарафли вазифани адо этиш чоғида ҳалок бўлган Ватанимизнинг жасур ўғлонлари гвардиячи йигитларнинг мардлиги тилга олиниб, энг эзгу сўзлар билан хотирланди.
Тадбирлар давомида қаҳрамонларимиз оила аъзолари ва яқинлари ҳолидан ҳам хабар олинди.