Сирдарё вилоятида жойлашган Миллий гвардия Ихтисослаштирилган ўқув маркази “Долзарб 90 кун” доирасида вилоят ўқувчи ёшларини “Шижоат ва ғайрат” ҳарбий спорт мусобақаси орқали бир мақсад сари бирлаштирди.
Президентимиз ташаббуси билан 1 июндан 30 августгача амалга оширилаётган “Долзарб 90 кун” лойиҳаси доирасида республикамиз бўйлаб ёшларнинг бўш вақтини мазмунли ташкил этиш, соғломлаштириш ҳамда уларни ҳар томонлама ривожлантиришга қаратилган қатор тадбирлар амалга оширилмоқда.
Хусусан, ёшлар ўртасида оммавий ва ҳарбий спорт мусобақаларини тизимли ташкил этиш орқали соғлом турмуш тарзини кенг тарғиб қилиш, уларни ҳарбий-ватанпарварлик руҳида тарбиялаш ҳамда ҳарбий хизматга бўлган қизиқишини ошириш мақсадида Миллий гвардия Ихтисослаштирилган ўқув марказида Давлат хавфсизлик хизмати, Сирдарё вилояти Ёшлар ишлари агентлиги, Ўзбекистон маҳаллалари уюшмаси вилоят бошқармаси, Миллий гвардия Сирдарё вилояти бўйича бошқармаси, Мудофаа бошқармаси, Спорт бошқармаси ҳамда Ўзбекистон ёшлар иттифоқи вилоят Кенгаши ҳамкорлигида “Шижоат ва ғайрат” ҳарбий-спорт мусобақасининг Сирдарё вилояти босқичи ўтказилди.
Унда туман ва шаҳар босқичи ғолиблари 6 та шарт асосида беллашиб, жисмоний, жанговар ва билим жиҳатдан қанчалик тайёргарликка эга эканликларини намойиш этдилар.
Ўқувчиларнинг кўрсаткичлари ҳакамлар ҳайъати томонидан холис баҳоланиб, мусобақа ғолиблари аниқланди. Унга кўра, 1-ўрин Мирзаобод тумани жамоасига, 2-ўрин Сардоба тумани жамоасига ва 3-ўрин Сирдарё тумани жамоасига насиб этди.
Ҳар бир ғолиб бўлган жамоа иштирокчиси диплом, қимматбаҳо эсдалик совғалари ва пул мукофоти билан тақдирланди.
“Долзарб 90 кун” доирасидаги мазкур тадбир ёшларнинг самарали ёзги таътилини ташкил этишга, уларнинг ҳарбий касбга бўлган қизиқишини оширишга хизмат қилди.
